Hamrun Sparatns xejn ma tħabtu biex għelbu l-isfida ta’ Gudja United bl-iskor kbir ta’ 4-0, fejn kienu diġá aċċertati mir-rebħa sa tmiem l-ewwel taqsima hekk kif kienu diġá tliet goals minn fuq. B’hekk huma kisbu double fuq il-Gudjani meta proprju nhar il-Ħamis li għadda kienu għelbuhom bl-iskor ta’ 3-0, din id-darba fir-round tal-aħħar 16 tal-IZIBET FA Trophy.
Permezz ta’ din ir-rebħa Hamrun ikkonsolidaw posthom fil-quċċata tal-klassifika b’41 punt, tliet punti vantaġġ fuq Floriana.
L-Ispartans kellhom lil Steve Borg u Jonny sospiżi.
Hamrun Spartans għamlu l-intenzjonijiet tagħhom ċari mal-ftuħ tal-partita u fetħu l-iskor wara biss erba’ minuti meta Luke Montabello dar tajjeb ma’ difensur avversarju u b’eleganza tefa’ l-ballun fir-rokna tax-xibka. Huma komplew jippressaw u fis-16-il minuta, l-istess Montebello kellu xutt b’saħħtu minn ġol-kaxxa salvat b’siequ mill-goalkeeper ta’ Gudja United, Justin Spiteri.
Kulma jmur kompla d-dominju assolut tal-Ispartans u żewġ minuti biss wara reġa’ kien Montebello li kellu x-xutt angulat tiegħu minn pożizzjoni ideali jiġi mdawwar f’corner minn Spiteri, bil-ballun jaħbat max-xibka minn barra biex ta l-illużjoni tal-goal.
Hamrun komplew jixxalaw u fis-26 minuta, minn azzjoni ta’ corner, Seth Painstil, kien fil-post it-tajjeb fil-mument opportun u permezz ta’ daqqa ta’ ras preċiża tefa’ ġewwa.
Huma skorjaw it-tielet goal biex jekk qatt kien hemm xi dubju aċċertaw ruħhom mir-rebħa fil-45 minuta meta wara li rċeieva minn corner mix-xellug ta’ Luke Monetbello, Elionay Freitas Da Silva, b’xamma kbira għall-goal u permezz ta’ daqqa ta’ ras tefa’ l-ballun wara Spiteri.
Fil-ftuħ tat-tieni taqsima, Hamrun komplew fejn ħallew fl-ewwel waħda u fis-57 minuta, Uros Duranovic, kellu xutt angulat fil-baxx li ħareġ l-aħjar ta’ Spiteri, li salva tajjeb minn mal-art.
Gudja wieġbu għall-ewwel darba fit-63 minuta meta Joseph Godwin Ime spara xutt mid-distanza li ħabat max-xibka minn barra.
Hamrun issiġillaw ir-rebħa permezz tar-raba’ goal fis-77 minuta meta Seth Paintsil avvanza tajjeb ġie wiċċ imb’wiċċ ma’ Spiteri, għadda tajjeb lejn Uros Duranovic li minn taħt il-lasta tefa’ ġewwa.
Huma komplew jamministraw il-vantaġġ komdu li kellhom sa tmiem il-partita.
Referee: Darryl Agius
BOV Plejer tal-Logħba: Luke Montabello (Hamrun S.)
