Rebħa kienet imperattiva minn Hamrun Spartans u din waslet bil-kbir meta huma umiljaw lil Naxxar Lions hekk kif għelbuhom bl-iskor kbir ta’ 6-0, fejn huma kienu diġá aċċertati mit-tliet punti sa tmiem l-ewwel taqsima, hekk kif kienu bnew vantaġġ ta’ erba’ goals.
Kienu Hamrun li ħolqu l-ewwel periklu fil-11-il minuta meta Raphael Lopes Silva kellu x-xutt bid-dawra tiegħu mid-distanza jintemm ftit barra.
Huma komplew jiddettew il-logħob u meritatament fetħu l-iskor tliet minuti wara meta minn freekick tal-Kroat Roko Prsa, iż-żagħżugħ Nikolai Micallef kien kważi kkommetta auto-goal bil-goalkeeper ta’ Naxxar Matthias Debono isalva parzjalment bil-ballun jintemm għand RAPHAL LOPES SILVA li minn taħt il-lasta tefa’ ġewwa.
Kulma jmur kompla d-dominju ta’ Hamrun u fil-25 minuta rduppjaw l-iskor meta JOSEPH ESSIEN MBONG avvanza tajjeb fil-kaxxa u spara l-ballun fix-xibka.
L-affarijiet komplew jikkomplikaw ruħhom għal Naxxar u tliet minuti wara Hamrun rebħu penalty meta Fernando Barbosa Pereira waqqa’ lil Chris Ondog fil-kaxxa. Mill-11-il metru inkariga ruħu LUKE MONTEBELLO li permezz ta’ xutt fil-baxx ma żbaljax.
Huma komplew jippressaw u fit-32 minuta Ryan Camenzuli indirizza cross fid-direzzjoni ta’ Raphael Lopes Silva li kellu x-xutt tiegħu minn taħt il-lasta jiġi salvat b’siequ minn Debono.
Naxxar wieġbu għall-ewwel darba fit-42 minuta meta wara li rċieva minn azzjoni ta’ freekcki, Takuma Yamaguchi, li tħalla żmarkat mid-difiża Ħamruniża, kellu d-daqqa ta’ ras tiegħu tiġi salvata parzalment mill-goalkeeper internazzjonali tal-Ispartans, Henry Bonello, b’Elionay Freitas Da Silva, ibiegħed il-ballun ‘il bogħod minn kull periklu.
Iżda Hamrun komplew jixxalaw u skorjaw ir-raba’ goal żewġ minuti wara meta CHRIS ONDONG avvanza tajjeb fil-kaxxa u tefa’ l-ballun fir-rokna tax-xibka.
Fit-48 minuta freekcik insidjuż ta’ Luke Montebello dejjem għal Hamrun għadda ftit barra.
U jidher li Hamrun ma kinux kuntenti biżżejjed b’dan l-iskor meta fil-55 minuta għamluhom ħamsa meta CHRIS ONDONG approfitta minn indeċiżjoni fid-difiża ta’ Naxxar, avvanza tajjeb u b’eleganza tefa’ l-ballun wara Debono, biex b’hekk irreġistra doppjetta personali.
Huma komplew ikabbru l-marġni tal-iskor fis-77 minuta meta s-sostitut SHAISEN ATTARD li kien ilu biss ħames minuti fil-ground, ikkontrolla tajjeb qabel spara l-ballun fir-rokna tax-xibka.
Ghaxar minti wara, Hamrun kienu għoddhom għamluhom sebgħa meta s-sostitut Talison Lui Barboza minn taħt il-lasta ra lil Debono jdawwar tajjeb f’corner.
Hamrun S. komplew jamministraw il-vantaġġ kbir li kellhom sa tmiem il-partita.
Referee – Daniel Casha
Plejer tal-Logħba – Chris Ondong (Hamrun S.)
