F’partita entużjażmanti mill-bidu sat-tmiem, Hamrun Spartans, komplew jikkonvinċu meta għelbu lil Naxxar Lions bl-iskor kbir ta’ 4-1, biex komplew jikkonsolidaw posthom fil-quċċata tal-klassifika bi 38 punt.
Għal Naxxar, irritornaw William Moreira Da Silva Marcilio wara li serva sitt logħbiet sospensjoni u Pablo Augusto Servo De Carvalo wara li kien sospiż logħba.
Hamrun għamlu l-intenzjonijiet tagħhom ċari mal-ftuħ tal-partita u wara biss żewġ minuti fetħu l-iskor meta Jonny Robert wara li rċieva mingħand Uros Duranovic kien fil-post it-tajjeb u b’xamma kbira għall-goal, tefa’ ġewwa. Huma komplew jippressaw u seba’ minuti wara Uros Duranovic kellu t-tentattiv angulat tiegħu jintemm ftit barra.
Iżda Naxxar ma rmewx ix-xugaman anzi wettqu reazzjoni tajba u fit-18-il minuta ġabu l-iskor indaqs meta Maicon De Souza Da Silva għadda tajjeb lejn Pablo Augusto Servo De Carvalho li minn qagħda ferm ideali spara xutt fil-baxx li ma ta l-ebda ċans lill-goalkeeper internazzjonali Malti tal-Ispartans, Henry Bonello.
Hamrun wettqu reazzjoni tajba u fil-25 minuta Luke Montebello indirizza cross pinġut li sab lill-awtur tal-ewwel goal, Jonny, li kellu d-daqqa ta’ ras tiegħu mill-viċin toħroġ l-aħjar tal-goalkeeper żagħżugħ ta’ Naxxar, Matthias Debono, li dawwar tajjeb f’corner.
L-Spartans komplew jiddettaw il-logħob u żewg minuti wara is-solitu Jonny xeħet cross-shot għan-nofs b’difensur ta’ Naxxar jitfa’ f’corner, għalkemm għal ftit ma qarraqx b’Matthias Debono. Fl-40 minuta huma meritatament reġgħu qalbu l-iskor favurihom meta Uros Duranovic venven xutt mill-isbaħ minn ġol-kaxxa li ma ta l-ebda ċans lil Debono, bil-ballun jintemm fis-saqaf tax-xibka biex l-ewwel taqsima intemmew 2 – 1 favur Hamrun.
Fil-ftuħ tat-tieni taqsima, Hamrun, komplew fejn ħallew fl-ewwel waħda u fil-55 minuta Uross Duranovic xeħet cross-shot għan-nofs lejn Jonny iżda dan tal-aħħar ma rnexxielux jagħmel kuntatt mal-ballun, li eventwalment intemm barra.
Huma komplew jipproduċu l-isbaħ logħob u fit-62 minuta Jonny għadda tajjeb lejn il-Kroat Roko Prsa li min-naħa tiegħu serva fuq platt tal-fidda lil Luke Montebello li ttanta xortih permezz ta’ xutt mill-ewwel minn qagħda ideali, li iżda ntemm barra.
Naxxar wieġbu tmien minuti wara meta l-awtur tal-uniku goal għalihom Pablo Augsusto Servo De Carvalho kellu l-konklużjoni tiegħu mill-viċin taħbat max-xibka minn barra, biex b’hekk tat l-illużjonai tal-goal. Iżda Hamrun skorjaw it-tielet goal fit-72 minuta meta Jonny kellu x-xutt tiegħu salvat parzjalment minn Debono, biex mir-rebound, Luke Montabello spara ġewwa.
Naxxar wieġbu tliet minuti wara permezz ta’ freekick insidjuż ta’ Maicon De Souza Da Silva li ġie salvat bi bravura minn Bonello.
Hamrun issiġillaw ir-rebħa permezz tar-raba’ goal fid-89 minuta meta minn azzjoni ta’ corner, il-ballun intemm għand Emerson Marcelina, li permezz ta’ daqqa ta’ ras minn taħt il-lasta tefa’ ġewwa.
Referee: Fyodor Zammit
BOV Plejer tal-Logħba: Uros Duranovic (Hamrun S.)
