Wara ħasda inizjali, Hamrun Spartans, b’supremzija territorjali, dawru telfa f’rebħa kbira u ferm meritata ta’ 6-1 kontra Marsaxlokk biex b’hekk bdew ir-Round tal-Għeluq tal-Malta Premier u din is-sena kalendarja 2025 fuq nota mill-aktar pożittiva.
Hamrun kellhom lil Juan Carlos Corbalan, Emerson Marcelina, Roko Prsa u Shaisen Attard neqsin minħabba injury. Madankollu, huma kienu msaħħa bir-ritorn minn sospensjoni ta’ Luke Montebello, Elionay Freitas Da Silva u Raphael Lopes Silva. Min-naħa l-oħra, Marsaxlokk kellhom lil Jai Quitongo u Lucas Lopez sospiżi.
Marsaxlokk fetħu l-iskor proprju fl-ewwel periklu li ħolqu fl-20 minuta meta ALEX DE AGUILAR GOMES spara xutt mill-isbaħ minn ġol-kaxxa li ntemm fir-rokna tax-xibka, biex tefa’ doċċa kiesħa fuq il-Ħamruniżi.
Iżda huma bilkemm kellhom cans jifirħu għal dan il-goal għaliex sitt minuti wara, Hamrun, ġabu l-iskor indaqs meta wara li rċieva minn cross pinġut, RAPHAEL LOPES SILVA, permezz ta’ daqqa ta’ ras preċiża tefa’ l-ballun fis-saqaf tax-xibka.
Hamrun tefgħu kollox fuq l-attakk fit-tentattiv li jaqilbu l-iskor favurihom u fil-35 minuta, Lui Talison Barbosa xeħet cross għan-nofs iżda ħadd mill-players sħabu ma rnexxielu jagħmel kuntatt mal-ballun.
U propju mil-azzjoni li segwiet sekondi biss wara, id-debuttant Montenegrin Jovan Cadenovic kellu x-xutt sabiħ tiegħu minn pożizzjoni ideali jiġi salvat f’corner bi bravura mill-goalkeeper Serb ta’ Marsaxlokk, Marko Drobnjak.
Azzjoni wara l-oħra Hamrun finalment ġew ippremjati permezz tal-goal fit-38 minuta meta l-iskorer prolifiku RAPHAEL LOPES SILVA b’xamma kbira għal-goal tefa’ wara Drobnjak u lill-partitarji numerużi Ħamruniżi f’delirju ta’ ferħ, biex b’hekk irreġistra doppjetta personali f’temp ta’ 12-il minuta.
Fil-ftuħ tat-tieni taqsima Hamrun komplew bl-istess ritmu tal-ewwel waħda u fl-54 minuta għamluhom tlieta meta RAPHAEL LOPES SILVA b’eleganza qabeż numru ta’ players avversarji u għeleb għal kollox lil Drobnjak, biex b’hekk irreġistra hat-trick personali u kompla jirriżulta bħala l-aqwa player fil-ġurnata.
U jidher li huma ma kinux kuntenti biżżejjed b’dan l-iskor hekk kif fid-69 minuta skorjaw ir-raba’ goal meta LUI TALISON BARBOSA mill-viċin tefa’ ġewwa.
Kompliet ix-xalata tal-goals għall-Ħamruniżi fl-84 minuta meta skorjaw il-ħames goal permezz tas-sostitut EDERSON BRUNO DOMINGOS li mill-viċin ma ta l-ebda cans lil Drobnjak.
Dan sabiex fid-89 minuta LUKE MONTEBELLO venven freekick mill-isbaħ li ntemm fix-xibka biex b’hekk issiġilla r-rebħa kbira Ħamruniża, b’dan ikun proprju l-100 goal tiegħu fil-Kampjonat Premier.
Il-kumplament tal-partita kien biss formalitá u Hamrun komplew jamministraw il-vantaġġ komdu li kellhom sat-tmiem tagħha.
Referee: Ishmael Barbara
Plejer tal-Logħba: Raphael Lopes Silva (Hamrun S.)
