Iċ-ċampjins Hamrun Spartans temmew l-impenji ta’ l-ewwel round tal-Kampjonat Premier fuq nota pożittiva b’rebħa konvinċenti fuq Hibernians, li fallew penalty kmieni u prattikament ftit li xejn kellhom x’juru wara li sabu ruħhom minn taħt anke jekk it-telfa ta’ 3-0 tidher ferm aktar ħarxa milli forsi kien jistħoqqilhom.
Hibernians kellhom ċans tad-deheb li jmorru fil-vantaġġ fl-10 minuta meta ngħataw penalty għal foul fil-kaxxa ta’ Steve Borg fuq Felicio Carvalho, iżda l-goalkeeper Hamruniż Francisco Da Paz salva tajjeb ix-xutt mill-11-il metru ta’ Jurgen Degabriele.
Fil-15-il minuta kien il-goalkeeper Pawlist Hugo Sacco li salva tajjeb xutt insidjuż ta’ Ryan Camenzuli, waqt li n-naħa l-oħra minuta wara Federico Falcone naqqas milli japprofitta meta xeħet għoli bir-ras minn qagħda tajba minn cross ta’ Giannis Bastianos.
Fit-28 minuta Hamrun fetħu l-iskor permezz taz-zagħzugħ Kean Scicluna li għeleb lil Sacco b’daqqa ta’ ras għar-rokna minn corner mogħti minn Talison Barboza.
Qabel intemmet it-taqsima Alfred Silas għal Hibernians ixxuttja ftit għoli minn tarf il-kaxxa l-kbira.
Fit-tieni taqsima assistejna għal ħafna logħob xejn effettiv f’nofs il-ground sakemm fil-75 minuta Hamrun irduppjaw meta Talison Barboza approfitta minn inċertezza fid-difiża avversarja biex avvanza u b’xutt imkaxkar għeleb għal kollox lil Sacco.
Tliet minuti biss wara Joseph Mbong impenja lil Sacco b’xutt b’sahhtu li l-goalkeeper Pawlist salva f’corner. Mill-corner mogħti minn Barbosa, kien l-istess Joseph Mbong li bi ġmiel ta’ rovexxjata spara l-ballun fix-xibka għat-tielet goal Hamruniż.
Wara dan il-goal inqalgħu xi nċidenti bejn xi players u r-referee Glen Tonna wera karta ħamra diretta lil Felicio Carvalho ta’ Hibernians.
Referee: Glen Tonna
Plejer tal-Logħba: Talison Barboza (Hamrun Spartans)
