Fl-ewwel partita tal-Ħadd fic-Centenary Stadium iltaqgħu l-leaders Ħamrun Spartans kontra Sirens, bl-Isptarans kienu ġejjin minn rebħa ta’ 4-0 kontra Gudja United, filwaqt li Sirens, fl-aħħar partita, kisbu punt fid-draw ta’ 1-1 kontra Marsaxlokk.
Għal din l-partita Ħamrun kienu mingħajr Ederson Bruno Domigos u Uros Duranovic li kien qed jiskontaw partita sospensjoni, filwaqt li Sirens kienu mingħajr Sacha Borg li wkoll kien sospiż.
Fl-ewwel azzjoni tal-partita, wara erba minuti, Hamrun Spartans marru fil-vantaġġ meta kien Luke Montebello li krossja u Jonny Do Nascimento Torres waħdu d-depożita l-ballun fix-xibka u poġġa lil Hamrun fil-vantaġġ.
Tliet minuti wara u reġgħu Hamrun meta kien Ryan Camenzuli li tefa’ kross li kien imtajjar mid-difiża ta’ Sirens, bil-ballun spiċċa Yulian Nenov li xxutja għoli. Fis-26 minuta Ħamrun Spartans resqu viċin li jkabbru l-iskor meta kien Juan Carlos Corbolan li krossja u Luke Montebello kellu xutt bid-dawra li ħabat mal-lasta qabel kien salvat mill-goalkeeper Andrea Cassar.
L-Spartans komplew jagħfsu u sekondi biss wara Luke Montebello għadda ballun lejn Ryan Camenzuli li krossja u Saith Paintsil b’daqqa ta’ ras ra l-ballun jisipiċċa mal-lasta.
Ħames minuti qabel l-intervall Hamrun Spartans għamlu l-iskor 2-0 meta kien corner mill-lemin ta’ Roko Prsa, il-ballun spiċċa għand Steve Borg li bir-ras indirizza għal ġewwa żda kien Luke Montebello li kkonkluda fix-xibka mill-viċin, biex dan il-goal kien l-mitt wieħed tiegħu fil-Kampjonat Premier.
It-tieni taqsima kienet relativament kwieta b’ħafna logħob f’nofs il-ground b’Hamrun fil-kontrol f’kull ħin.
L-ewwel azzjoni denja ta’ nota fit-tieni taqsima waslet kwarta mit-tmiem meta Daniel Agius ta’ Sirens krossja u Frank Boateng kellu d-daqqa ta’ ras tiegħu tintemm barra. Sitt minuti mit-tmiem u kienu l-Spartans permezz ta’ Juan Carlos Corbolan li krossja fil-baxx iżda ħadd mill-plejers ta’ Hamrun ma’ ħa l-ballun b’finalment Sirens jikklerjaw il-periklu.
Fl-aħħar mumenti tal-partita Sirens reġgħu pruvaw ikunu perikolużi meta l-konklużjoni ta’ Nicholas Pulis ġiet imdawwra f’corner minn Henry Bonello.
Referee:- Ezekiel Barbara
BOV Plejer tal-partita: – Jonny Robert Do Nascimiento Torres (Hamrun Spartans)
