Is-7 ta’ Marzu tal-2020. Ħames snin ilu. F’konferenza tal-aħbarijiet mill-Ministru għas-Saħħa ta’ dak iż-żmien, Chris Fearne, u s-Supretendent tas-Saħħa Pubblika, il-Professur Charmaine Gauci, kien tħabbar kif f’Malta kien ġie rreġistrat l-ewwel każ tal-COVID-19.
Dan l-ewwel każ ta’ tifla Taljana, li kienet għadha kemm waslet f’pajjiżna mal-ġenituri tagħha, irriżulta erbat ijiem qabel il-virus ġie ddikjarat bħala pandemija mill-Għaqda Dinjija tas-Saħħa, il-WHO.
L-imxija tal-virus bdiet minn Wuhan fiċ-Ċina u nxterdet madwar id-dinja, fosthom ukoll fil-kontinent Ewropew.
Mingħajr ebda manwali jew linji-gwida f’ċirkostanzi simili, din kienet sfida ewlenija għad-dinja kollha u inkluż għall-Gvern Malti, li kien għadu kemm għadda f’idejn il-Prim Ministru Robert Abela.
Hawnhekk tħabbru miżuri, li qatt ma kienu mistennija, fosthom l-għeluq tal-Ajruport, l-iskejjel u ħafna mil-istabbilimenti kummerċjali, b’mod partikolari dawk tal-catering u l-ospitalità. Imbagħad il-ftuħ ta’ ċerti ħwienet seħħ, iżda b’miżuri ta’ prekawzjoni, bin-nies imħeġġa żżomm id-distanza.
Iżda, bil-kontra tal-maġġoranza ta’ pajjiżi oħrajn, il-Gvern Malti ma impona l-ebda lockdown totali, kif kienet qed tissuġġerixxi l-Oppożizzjoni Nazzjonalista dak iż-żmien.
Il-Gvern tal-Prim Ministru Robert Abela ried iżomm il-bilanċ importanti bejn is-saħħa u l-ekonomija. Dan wassal biex, ftit ġimgħat mindu ġie rreġistrat l-ewwel każ u ngħalqu bosta l-istabbilimenti fil-pajjiż, il-Prim Ministru Robert Abela nieda l-COVID Wage Supplement.
Din il-miżura bla preċedent wasslet biex il-Gvern jagħmel tajjeb għall-ħlas ta’ iżjed mill-Paga Minima Nazzjonali lill-ħaddiema fil-privat li l-postijiet tax-xogħol tagħhom kellhom jingħalqu.
B’hekk ma ntilfu l-ebda mpjiegi, differenti kif seħħ fil-bqija tal-pajjiżi.
Din l-għajnuna mill-aktar importanti ġiet tiswa lill-pajjiż mas-seba’ mija u ħamsin miljun ewro, wara li fil-bidu tal-pandemija kien imbassar li mal-50,000 persuna setgħu jitilfu l-impjieg waqt li għadd ta’ negozji jispiċċaw jagħlqu l-bibien tagħhom darba għal dejjem.
F’Ġunju tal-2020, il-Gvern nieda Pjan ta’ Riġenerazzjoni Ekonomika, b’injezzjoni ekonomika ta’ kważi disa’ mitt miljun ewro. Dan inkluda traħħis fil-prezzijiet tal-fuels, vawċers ta’ mitt ewro lil kull persuna fil-pajjiż u rifużjoni fil-kontijiet tad-dawl għan-negozji. Dan wassal biex ingħata sostenn lin-negozji u l-familji.
F’fora internazzjonali, speċjalment fl-istituzzjonijiet tal-Unjoni Ewropea, Malta ressqet ’il quddiem il-proposta li, meta jinħareġ il-vaċċin għal dan il-virus, jitqassam b’mod ekwu fost l-istati membri.
U hekk ġara. Meta l-għada tal-Milied tal-2020 waslu l-ewwel dożi tal-vaċċin f’pajjiżna, mill-għada, bdew jitlaqqmu l-ewwel il-ħaddiema tas-saħħa lokali.
F’dan il-perjodu, Malta ġiet imfaħħra mill-Għaqda Dinjija tas-Saħħa u l-Kummissjoni Ewropea hekk kif kellha l-ogħla rata ta’ tilqim fid-dinja kollha.
Sa minn sentejn wara l-bidu ta’ din il-kriżi ta’ saħħa, l-ekonomija Maltija bdiet turi l-ewwel sinjali reali tal-irkupru sħiħ u bdiet tikber iżjed miċ-ċifri tal-2019, l-aħħar sena qabel il-pandemija.
Fuq dawk il-passi u n-nuqqas ta’ riperkussjonijiet serji bis-saħħa tal-miżuri tal-Gvern Malti, anke s-settur turistiku lokali beda jirreġistra numri rekord.
Dan anke jekk, minn Frar tal-2022, kellha tfaqqa’ kriżi oħra, dik tal-enerġija fl-Ewropa, kawża tal-invażjoni Russa fl-Ukrajna, fejn il-Gvern Malti wkoll adotta mudell simili biex jagħti appoġġ bla preċedent lill-familji u n-negozji.
