Żewġ barranin li, fuq dak li qalu fl-inkjesta tal-isptarijiet, inħarġu akkużi kontra l-eks Prim Ministru Joseph Muscat, taw ix-xhieda tagħhom quddiem il-Maġistrat Gabriella Vella u l-esperti barranin imqabbdin minnha, iżda mhux fil-preżenza tal-Pulizija Maltija.
Dan jirriżulta minn dak li xehed fil-Qorti fl-aħħar jiem il-Kummissarju tal-Pulizija Angelo Gafà, f’kawża miftuħa mill-eks Prim Ministru Joseph Muscat fejn qed isostni li nkisru d-drittijiet tiegħu.
Fl-istess seduta, xehed l-eks Spettur Anthony Scerri li, bejn April tal-2021 u Ġunju tal-2022, kien assenjat fuq din l-inkjesta.
Għall-mistoqsijiet tal-Avukat Vince Galea, Scerri qal li, meta f’Novembru tal-2021 informa lill-Maġistrat Vella bit-talba tal-ghaqda Repubblika biex tinfetaħ investigazzjoni fil-konfront tal-eks Prim Ministru, l-istess Maġistrat weġbitu li kienet diġà taf b’din it-talba.
L-eks Spettur qal li l-Maġistrat talbitu biex, b’rabta mat-talba ta’ Repubblika, jagħmel l-arranġamenti neċessarji bil-għan li żewġ ċittadini barranin – Kamal Sharma u Tyrone Greenshields – jinġiebu Malta biex jixhdu.
Spjega li hu ghamel talba f’dan is-sens permezz tal-Interpol, iżda żied li qatt ma rċieva tweġiba u, min-naħa tiegħu, ma jafx jekk ġewx jixhdu.
Jirriżulta, iżda, li kif xehed il-Kummissarju Gafà dawn kienu fil-fatt ġew Malta fil-bidu tal-2022 u taw ix-xhieda tagħhom. Madankollu, meta sar dan, il-Maġistrat Vella talbet li jkollha magħha biss lill-esperti barranin li, bl-approvazzjoni tagħha, tħallsu €11-il miljun u ma informatx lill-Pulizija Maltija.
Wieħed minn dawn il-barranin, Kamal Sharma, kien xehed li, skontu, Joseph Muscat hu involut għax kien sema’ persuna oħra tgħid li, meta ma baqax Prim Ministru, spiċċa bla karozza u bla dar u kellu bżonn l-għajnuna.
Minkejja li hu fatt magħruf li, dan assolutament mhux minnu, l-esperti emmnu dak li qalilhom Sharma u inkludew fl-inkjesta tali allegazzjonijiet bla bażi bħala provi.
Fl-istess seduta, l-eks Spettur Scerri xehed li kienet il-Maġistrat Gabriella Vella li, personalment, ordnat li ssir is-search fid-dar tal-eks Prim Ministru Joseph Muscat f’Jannar tal-2022.
Tfittxijiet li kienu jsiru biss mill-esperti barrranin u l-Pulizija Maltija kienet biss tpoġġi fil-boroż l-affarijiet li kienu jinġabru u tissiġillahom.
Lanqas fil-laqgħat qabel kull search ma kienu jiġu informati l-Pulizija Maltija u l-esperti barranin kienu jingħataw id-direzzjoni mill-Maġistrat Vella, spjega l-eks Spettur.
Min-naħa tiegħu, il-Kummissarju Angelo Gafà qal li kull azzjoni tal-Pulizija fl-inkjesta tal-isptarijiet dejjem ittieħdet fuq struzzjonijiet u b’kordinazzjoni mal-Maġistrata u qatt ma sar xejn jekk mhux bl-approvazzjoni tagħha.
Gafà xehed li kien hemm drabi fejn il-Korp ingħata direzzjoni mill-Maġistrat, iżda kien hemm drabi fejn il-Korp baqa’ bla tweġiba.
