Ħajja ġdida lill-appartamenti tal-Gvern; uħud kienu ilhom 40 sena jistennew manutenzjoni

Il-Ministru għall-Familja u Solidarjetà Soċjali Michael Farrugia żar xogħol ta’ manuntenzjoni u rinovar li qed isir fi bokka residenzjali tal-Gvern f’ San Ġiljan. Hawn kien ilu ma jsir restawr għal aktar minn 40 sena.

Hawn osserva li għaddew erba’ snin minn mindu dan il-Gvern ingħata l-fiduċja u l-opportunità biex jaħdem għall-pajjiż.

Il-Ministru stqarr: “Għamilna hafna affarijiet għall-ewwel darba, diversi sfidi li nbidlu f’opportunitajiet. Kienu erba snin ta’ riformi u li wasslu għal-bidla għall-ahjar. Riformi li wħud minnhom affettawaw direttament lil kull familja Maltija u Ghawdxija fil-ħajja tagħhom ta’ kuljum. Dawn kienu sensiela ta’ bidliet li irnexxielna niksbu grazzi għall- ottimiżmu u grazzi għax-xogħol”.

Qal li l-Awtorità tad-Djar, magħtul dawn l-aħħar erba’ snin ħadmet sabiex isiru numru ta’ xogħolijiet fuq binjiet eżistenti u li kellhom bżonn xogħol ta’ manutenzjoni. Dan ix-xogħol sar fil-lokalitajiet tal-Isla, Raħal Ġdid, San Pawl il-Baħar, il-Ħamrun, Ta’ Giorni u Pembroke.

Dawn sewew madwar miljun u erba’ mitt elf ewro u l-ħsieb hu li jsir xogħol simili fil-Mellieħa, Ħal Lija u Ħ’Attard.

Ix-xogħol li sar u li qed isir jikkonsisti f’dan li ġej: xogħol preparatorju, xogħol tal-ġebel, xogħol fuq il-bjut, xogħolijiet fuq metal, tindif u tiswija ta’ konkrit fis-soqfa, xogħol ta’ ilma li għandu x’jaqsam ma’ drenaqq u fejn imur l-ilma tax-xita, xogħol ta’ madum u rħam, xogħol ta’ tisbieh, xogħol tal-aluminium, xogħol tal-konkos u xogħol tal-elettriku.

Il-ħsieb tal-Gvern hu li jitwaqqaf team ta’ manuntenzjoni li jaħdem apposta fuq binjien bħal dawn.