Il-Caritas preżentat rapport li jistabilixxi l-ammont tad-dħul minimu li bniedem għandu bżonn biex jgħix ħajja sempliċi imma diċenti.
L-istudju sar fost tliet tipi ta’ familji – familja tradizzjonali magħmula minn żewġ adulti u żewġt itfal, familja b’ġenitur wieħed u żewġt itfal, u koppja anzjana.
Meta sar l-istudju dwar id-dħul bażiku, ġew ikkunsidrati ċertu affarijiet essenzjali bħall-ikel, ħwejjeġ, is-saħħa, l-edukazzjoni, it-trasport, il-housing u l-manutenzjoni tad-dar.
Dan kien it-tielet rapport tax-xorta tiegħu mill-Caritas wara li sar wieħed fl-2012 u ieħor fl-2016.
Hawnhekk il-Gvern innota li meta wieħed iqabbel il-budget meħtieg skont il-kalkoli tal-Caritas mad-dħul effettiv f’seba’ kategoriji differenti ta’ sitwazzjonijiet, isib li fil-maġġoranza tal-kategoriji imsemmija inkluż pensjonanti jew familji bit-tfal fejn xi ħadd mill-ġenituri jaħdem, il-familji konċernati għandhom dħul li jaqbeż il-budget.
F’każ minnhom dan jaqbeż b’19% filwaqt li fit-tliet kategoriji l-oħra hemm distakki pożittivi li jvarjaw saħansitra bejn l-34% u s-47%.
B’kuntrast, fl-istudju tal-2012 kien ħareġ biċ-ċar li l-benefiċċji, speċjalment il-pensjoni minima, ma kinux biżżejjed biex ikopru budget minimu ta’ spiża.
Mill-bqija tal-kategoriji hemm żewġ kategoriji fejn għad hemm distakk negattiv żgħir ta’ 4.3%.
F’dan il-kuntest, il-Gvern ħa nota tal-kategoriji li għadhom taħt dan il-budget, liema kategoriji huma dawk fejn il-ġenituri ma jaħdmux jew jgħixu fuq l-benefiċċji soċjali.
Il-Gvern semma kif l-istudju tal-Caritas isemmi ċ-children’s allowance, l-inwork-benefit u anki għajnuna fil-ħlasijiet tal-kontijiet tad-dawl u l-ilma.
Il-Ministeru għas-Solidarjetà u l-Ġustizzja Soċjali qal li bis-saħħa tat-titjib fil-paga minima nazzjonali u tal-pensjonijiet, kif ukoll l-għadd sostanzjali ta’ miżuri li ddaħħlu fis-seħħ fl-aħħar ħames snin, kien hemm żidiet fid-dħul li mill-anqas ivarja bejn 14% u 23%, u fil-maġġoranza tal-każi l-oħra qabżu l-40%.
Il-Gvern qal li huwa sodisfatt li bosta jaqbżu l-kategoriji tal-budget tal-istudju tal-Caritas wara li wessa’ l-basket li fuqu huwa stabbilit il-budget permezz ta’ prodotti u servizzi ġodda.
Dwar dan l-aħħar rapport, id-Direttur tal-Caritas, Anthony Gatt, qal li din id-darba saret enfasi fuq familji li għandhom xi membru b’diżabilità.
Qal kif, “L-iktar familji li jbatu huma fejn hemm multiple severe disabilities allura l-bżonnijiet ta’ apparat, ta’ mediċina, jekk ikun hemm xi kundizzjonijiet bħal coeliac per eżempju, hemmhekk il-bżonnijiet jikbru b’mod esaġerat.”
Il-Caritas ħarġet ukoll b’ħamsa u għoxrin rakkomandazzjoni frott ir-riżultati minn dan l-istħarriġ, fosthom biex jiġi rivedut il-mekkaniżmu ta’ kif jinħadem il-COLA, u biex jinħoloq istitut għar-riċerka dwar il-faqar u l-ġustizzja soċjali.
Intant il-Prim Ministru Robert Abela ġie ppreżentat bid-dokument imħejji mill-Caritas.
Id-Direttur tal-Caritas Anthony Gatt irringrazzja lill-Prim Ministru talli dejjem ta widen għal dak li tkun fasslet il-Caritas filwaqt li l-Prim Ministru Robert Abela qal li dan il-gvern huwa impenjat li jibqa’ jkun qrib ta’ għaqdiet bħal Caritas u jaġixxi fuq l-ideat li jippreżentaw.
