F’konfront li ħa l-ħajja fit-tieni taqsima, wara żewġ riżultati konsekuttivi ta’ draw, Gzira United irritornaw għar-rebħ meta għelbu lil Balzan bl-iskor ta’ 2-1, biex komplew ikabbru l-problemi għal dawn tal-aħħar. Din ir-rebħa tista’ titqies bħala waħda iktar rimarkabbli għall-Maroons hekk kif lagħbu għal iktar minn taqsima sħiħa bi player inqas.
Kienu Balzan li ħolqu l-ewwel periklu fit-18-il minuta meta wara li rċieva minn cross mix-xellug, Dimeji Awosanja kellu t-tentattiv tiegħu minn taħt il-lasta salvat b’diffikultá mill-goalkeeper veteran tal-Maroons, Justin Haber.
Gzira wieġbu żewġ minuti biss wara u kienu sfortunati li ma fetħux l-iskor meta l-Brażiljan Gabriel Bohrer Mentz kellu xutt mid-distanza li stampa mal-wieqfa, b’Balzan jeħilsuha ħafif.
Fis-37 minuta, il-Maroons qalgħu daqqa ta’ ħarta hekk kif spiċċaw jilagħbu b’10 players meta tkeċċa għalihom permezz ta’ karta ħamra diretta il-player Marcelo Dias wara li deher jimbotta u jolqot f’wiċċu lill-player ta’ Balzan.
Balzan bdew japprofittaw mill-vantaġġ numeriku fil-ground u fil-45 minuta Dimeji Awosanya għadda pass fil-baxx għan-nofs iżda pront kien Gabriel Bohrer Mentz għal Gzira li tefa’ l-ballun f’corner.
Fil-ftuħ tat-tieni taqsima, Balzan komplew fejn ħallew fi tmiem l-ewwel waħda u fid-49 minuta wara taħwida fil-kaxxa, bil-ballun jasal għand Alexander Ayo Akpan li minn taħt il-lasta ħareġ l-aħjar ta’ Haber li dawwar f’corner bi bravura.
Mill-corner li rriżulta, Nicholas Pulis, kellu d-daqqa ta’ ras tiegħu mill-viċin tintemm ftit għoli.
Gzira wieġbu fid-69 minuta meta daqqa ta’ ras ta’ Luis Carlos Riascos irriżultat bħala waħda fraġli u nieqsa mill-preċiżjoni u ntemmet ftit barra.
Iżda kienu Balzan li fetħu l-iskor fil-71 minuta permezz ta’ xutt mid-distanza l-ġmiel tiegħu ta’ JAN BUSUTTIL li ma ta l-ebda ċans lil Haber.
Madankollu Balzan bilkemm kellhom ċans jifirħu għal dan il-goal li Gzira ma ġabux l-iskor indaqs erba’ minuti biss wara permezz ta’ goal ieħor mill-isbaħ mid-distanza din id-darba ta’ FAYSAL HASSANY CHOUHAB li ħasad għal kollox lill-goalkeeper ta’ Balzan, Dylan Ciappara.
Huma komplew jippressaw u fit-80 minuta, kienu sfortunati li ma qalbux l-iskor favurihom meta Thiago Espindola kellu tentattiv minn freekick mid-distanza jistampa mal-wieqfa.
Dan sabiex żewġ minuti biss wara, Gzira skorjaw il-goal tar-rebħa permezz ta’ xutt minn barra l-kaxxa ta’ THAYLOR ALDAMA, li ġie devjat għal ġewwa minn player ta’ Balzan.
Gzira komplew jamministraw il-vantaġġ minimu li kellhom sa tmiem il-partita.
Referee: Ezekiel Barbara
Plejer tal-Logħba: Thaylor Aldama (Gzira U.)
