F’dak li hu magħruf bħala d-‘Derby tax-Xatt’, Gzira U. kisbu draw ġust u drammtiku ta’ 2-2 kontra l-ġirien Sliema W.
Kienu Gzira li ħolqu l-ewwel periklu wara biss tliet minuti meta Gabriel Bohrer Mentz għadda ballun fit-tul lejn Thaylor Aldama li avvanza tajjeb u kellu x-xutt tiegħu jaħbat max-xibka minn barra, biex ta l-illużjoni tal-goal.
Sliema wieġbu fid-19-il minuta permezz ta’ xutt mill-ewwel minn ġol-kaxxa ta’ Adam Magri Overend li ntemm ftit barra.
Gzira reġgħu ħolqu l-periklu fil-25 minuta meta f’azzjoni kważi foto-kopja tal-ewwel waħda li ħolqu kmieni fil-partita, Bohrer Mentz għadda ballun fit-tul lejn Aldama li evita lill-goalkeeper Slimiż Kelvin Emeka-Agu iżda x-xutt tiegħu ma kienx b’saħħtu biżżejjed biex jintemm fix-xibka, bil-captain tal-Wanderers Henrique Murillo jitfa’ l-ballun f’corner.
Sliema rrispondew fit-32 minuta meta Myles Beerman xeħet cross fil-baxx iżda l-goalkeeper veteran tal-Maroons Justin Haber ħareġ tajjeb minn postu u interċetta kull periklu.
Huma komplew jiddettaw il-logħob u fl-44 minuta fetħu l-iskor meta Adam Magri Overend għadda tajjeb lejn Matos da Silva li min-naħa tiegħu serva fuq platt tal-fidda lill-iskorer prolifiku Sloven VITO PLUT li żmarkat u b’logħob tat-tfal tefa’ ġewwa.
Fit-58 minuta Sliema tilfu ċans tad-deheb li jirduppjaw l-iskor meta Myles Beerman xeħet cross lejn Matos Da Silva li tħalla waħdu mid-difiża ta’ Gzira u kellu d-daqqa ta’ ras tiegħu tistampa mal-wieqfa, bil-Maroons jeħilsuha ħafif.
Iżda kontra x-xejra tal-logħob fit-62 minuta, Gzira rebħu penalty meta d-difiża ta’ Sliema nqabdet fuq sieq waħda meta l-ewwel Alex Da Paixao Alves u mbagħad Kevin Tulimieri twaqqgħu fil-kaxxa minn players ta’ Sliema. Mill-11-il metru inkariga ruħu l-ispeċjalista GABRIEL BOHRER MENTZ li permezz ta’ xutt preċiż u angulat fil-baxx għadda l-ballun minn taħt Agu, b’dan ikun l-ewwel goal li sofrew il-Wanderers f’dan il-kampjonat.
Madankollu, Siiema reġgħu marru fil-vantaġġ fl-74 minuta meta VITO PLUT b’intelliġenza u eleganza liema bħalhom qabbeż il-ballun minn fuq Justin Haber, b’dan ikun it-68 goal tiegħu fl-ogħla diviżjoni tal-futbol Malti.
Gzira tefgħu kollox fuq l-attakk u mad-90 minuta, Kevin Tulimieri minn pożizzjoni ideali ġiegħel lil Egu isalva b’diffikultá.
Huma komplew jippressaw u meritatament ġabu l-iskor indaqs fil-95minuta meta fl-aħħar nifs tal-konfront, Faysal għadda tajjeb lejn LUIS CARLOS RISACOS li minn taħt il-lasta tefa’ ġewwa.
Referee: Alex Johnson
Plejer tal-Logħba: Vito Plut (Sliema W.)
