F’partita pjaċevoli u movimentata, Gzira United għelbu l-isfida ta’ Zabbar bl-iskor ta’ 3-1 fit-tieni partita tas-Sibt wara nofsinhar fit-Tony Bezzina Stadium.
Kienet rebħa meritata għall-Maroons hekk kif għal waqtiet twal fil-partita speċjalment fit-tieni taqsima kienu huma li ddettaw il-logħob, fejn li kieku kienu iktar preċiżi fl-attakk l-iskor seta’ saħansitra kien ikbar favurihom.
Kienu Zabbar li ħolqu l-ewwel periklu wara tliet minuti meta Joao Diogo Tavares avvanza tajjeb iżda kellu x-xutt tiegħu jaħbat max-xibka minn barra.
Iżda kienu Gzira li fetħu l-iskor fid-disa’ minuta meta Thiago Espindola xeħet cross lejn GABRIEL BOHRER MENTZ li permezz ta’ daqqa ta’ ras preċjża mill-viċin tefa’ ġewwa.
Zabbar ma rmewx ix-xugaman anzi wettqu reazzjoni mill-aqwa ta’ dan ġew ippremjati permezz tal-goal tad-draw fil-21 minuta meta minn azzjoni ta’ corner mogħti minn Zachary Grech, DORDE JOVICIC, kien fil-post it-tajjeb fil-mument opportun u permezz ta’ xutt mill-ewwel tefa’ ġewwa.
Sitt minuti wara, il-coach Taljan ta’ Zabbar, Aniello Parisi kien kostrett jaffettwa sostituzzjoni sfurzata meta weġġa’ għalihom il-player David Oliveira Souza biex minfloku daħal jilgħab is-sostitut Maritim Augusto Ferreira.
Gzira kienu għoddhom reġgħu marru fil-vantaġġ fit-28 minuta meta Thaylor Aldama xeħet il-ballun fid-direzzjoni ta’ Alex Da Paixao Alves li iżda ġie antiċipat fil-ħin propizju mill-goalkeeper ta’ Zabbar Mattahew Grech.
Fil-ftuħ tat-tieni taqsima, Gzira ħarġu ferm aggressivi u fis-56 minuta Thaylor Aldama kellu xutt b’saħħtu u angulat minn ġol-kaxxa li ntemm ftit għoli.
Huma komplew fuq l-offensiva u żewġ minuti wara Christian Saint Ebisinidor kellu x-xutt tiegħu minn tarf il-kaxxa jintemm għoli.
Azzjoni wara l-oħra finalment Gzira reġgħu marru fil-vantaġġ fil-61 minuta Thaylor Aldama provda l-assist lil ALEX DA PAIXAO ALVES li permezz ta’ xutt mill-ewwel fil-baxx minn ġol-kaxxa tefa’ l-ballun fir-rokna tax-xibka.
Huma ssiġillaw ir-rebħa permezz tat-tielet goal fis-86 minuta meta ALEX DA PAIXAO ALVES qabeż tliet difensuri avversarji, avvanza tajjeb fil-kaxxa qabel spara xutt mill-isbaħ li ma ta l-ebda ċans lil Matthew Grech, biex b’hekk irreġistra doppjetta personali.
Fil-ħin miżjud, il-Maroons kellhom f’saqajhom il-ballun tar-raba’ goal meta s-sostitut Faysal Hassany Chouhab dar tajjeb ma’ difensur avversraju qabel kellu l-konklużjoni fil-baxx tiegħu tintemm ftit barra.
Referee: Ezekiel Barbara
Plejer tal-Logħba: Taylor Aldama (Gzira U.)
