Gzira United żammew posthom fil-Kampjonat Premier għall-istaġun li ġej grazzi għal rebħa mistħoqqa fuq Floriana bl-eroj indiskutibbli taghhom ikun Gabriel Bohrer, li skorja tnejn mit-tliet goals u kellu sehem ukoll fil-goal l-ieħor.
Fl-ewwel ħinijiet kienu Floriana li fetħu fuq l-attakk bla ma pero’ kienu perikolużi, biex mal-ħin kienu Gzira li heddew tant li marru fil-vantaġġ fis-17-il minuta meta l-goalkeeper Furjaniż Nemanja Andrijanic salva imma ma żammx freekick mill-bogħod ta’ Gabriel Bohrer, biex ħa r-rebound Taylor Aldama li mill-qrib tefa’ l-ballun fix-xibka.
L-istess Aldama reġa’ skorja fid-29 minuta minn azzjoni ta’ corner imma l-goal tħassar ghal offside ta’ l-istess player.
Floriana bil-mod il-mod bdew iżidu fl-isforzi tagħhom u kisbu l-goal tad-draw fl-44 minuta meta minn azzjoni ta’ freekick Lorenzo de Grazia għalkemm angolat irnexxielu jispara xutt li spiċċa fir-rokna tax-xibka.
Floriana ħarġu fuq l-attakk fit-tieni taqsima u fid-49 minuta freekick mill-bogħod ta’ Lorenzo De Grazia ġiegħel lill-goalkeeper Darijan Zarkov isalva b’diffikulta’ f’corner.
Tliet minuti biss wara Gzira reġgħu marru fil-vantaġġ meta Gabriel Bohrer ħa tajjeb clearance tad-difiża Furjaniża u bi ġmiel ta’ xutt minn madwar 25 metru bogħod halla lil Andrijanic iħares.
Floriana resqu qrib li jiksbu l-goal tad-draw fid-69 minuta meta Maksim Valadzko dendel ballun insidjuz li kienu għoddu ħasad lil Zarkov iżda dan irnexxielu jdawwar il-ballun f’corner.
Fid-79 minuta reġgħu Floriana permezz ta’ Jake Grech li minn qagħda angolata ra x-xutt tiegħu jispiċċa ftit barra.
Iżda fit-83 minuta Gzira aċċertaw posthom fil-Kampjonat Premier bit-tielet goal skurjat għal darb’oħra minn Gabriel Bohrer li skorja bir-ras mill-qrib minn corner mogħti minn Jackson Mendoza.
Referee: Glen Tonna
BOV Plejer tal-Logħba: Gabriel Bohrer (Gzira Utd)
