Rekord ta’ tkabbir ekonomiku, ħolqien ta’ impjiegi, livell baxx ta’ defiċit u rating ta’ pajjiżna għal A. Riżultati pożittivi li rnexxielu jikseb Gvern Laburista matul dawn l-aħħar snin, permezz tal-miżuri mwettqa mill-baġit 2016. Dan it-tkabbir ekonomiku flimkien mat-titjieb fil-kwalitá ta’ ħajja huma riżultat ta’ baġits ibbażati fuq direzzjoni politika ċara li tipremja lil min jaħdem.
Il-Baġit li jmiss se jkun qed jibni fuq is-suċċessi filwaqt li jaħdem fuq aktar miżuri li joffru inklużjoni soċjali u ġustizzja soċjali. Dan kien tħabbar fid-dokument ta’ qabel il-baġit li dwarhu saret konsultazzjoni mal-imsieħba soċjali, dokument li kif ikkonferma l-Prim Ministru Joseph Muscat fid-diskors tiegħu fiċ-Ċentru Laburista tal-Marsa, se jkun baġit soċjali li se jkompli jferrex il-ġid fost dawk il-membri tas-soċjetá li l-ġid għadu mhux qed jasal għandhom. Gvern li minkejja li huwa u se jibqa pro-business jemmen li ż-żgħir għandu jingħata iktar u li dan il-ġid jitgawda minn min qed ibagħti u mhux min jabbuża.
Il-proposti tal-baġit tas-sena l-oħra, kienu msejsa li jippremjaw lil min jaħdem, li kif tikkonferma tajjeb l-istatistika naqsu n-numru ta’ persuni li jiddependu fuq il-benefiċċji soċjali, fosthom fost iż-żgħażagħ. Il-miżuri mwettqa gawdew minnhom faxxex differenti tas-soċjeta’ fosthom:
- Child care b’xejn għal min jaħdem, li kif tikkonferma l-istatistika, jfisser li aktar nisa daħlu fid-dinja tax-xogħol
- Żieda fl-istipendju inkluż studenti li jirrepetu, li jfisser li aktar studenti bbenefikaw minn għajnuna finanzjarja biex ikunu jistgħu jkomplu l-istudji tagħhom
- Bini ta’ skejjel ġodda kif ukoll tablets lit-tfal tagħna, li jfisser ambjent edukattiv aħjar
- L-ewwel żieda f’25 sena fil-pensjoni, li assigurat ħajja aħjar għall-anzjani tagħna
- Numru ta’ investimenti u proġetti infrastrutturali li bbenefikaw minnhom Maltin u Għawdxin
Id-dokument tal-baġit 2017, jpoġġi l-edukazzjoni, is-saħħa u s-sigurtá soċjali bħala prijoritajiet ewlenin flimkien ma’ tisħiħ f’dik li hija solidarjetá soċjali. Prijoritá oħra se tibqa l-edukazzjoni, bl-għan li l-Gvern ikompli jtejjeb il-kwalitá tal-ħiliet tal-ħaddiema kif ukoll ikompli jinċentiva aktar studenti biex ikomplu l-istudji tagħhom fost oħrajn biż-żieda fl-istipendji skont l-għoli tal-ħajja.
Is-settur tas-saħħa se jkompli jingħata l-attenzjoni meħtieġa biex itejjeb l-aċċess għas-saħħa u jkompli jnaqqas il-listi ta’ stennija. L-enerġija se tibqa wkoll settur ewlieni ta’ investiment fejn saħansitra mistennija tagħmel profitt għall-ewwel darba s-sena d-dieħla.
Għal darb oħra l-gzira Għawdxija mistennija tingħata promenenza fil-baġit tas-sena d-dieħla, filwaqt li fil-qasam tal-ġustizzja, l-gvern huwa kommess li jnaqqas id-dewmien fil-każijiet tal-qrati biex itejjeb l-aċċess għall-ġustizzja. Kif ukoll numru ta’ proposti oħra.
Dan il-Gvern assigura wkoll li għal sena oħra jagħti rendikont tat-twettiq tal-miżuri tal-baġit, fejn l-id amministrattiva tal-Gvern ħejjiet dokument ‘It-Twettiq tal-Baġit 2016’ li huwa xhieda tal-importanza tal-ippjanar u l-koordinazzjoni bil-għan li l-miżuri li jkunu tħabbru fil-Baġit jiġu mwettqa.
Din is-sena twettqu 80 miżura aktar meta mqabbel mal-ammont ta’ miżuri implimentati fl-2014. Dan filwaqt li meta mqabbel mal-ammont ta’ miżuri implimentati fl-2015, din is-sena twettqu 52 miżura aktar.
B’hekk din is-sena se jkunu twettqu 73% tal-miżuri, li jinkludu wkoll dawk il-miżuri li se jiġu implimentati sal-aħħar tas-sena.
