F’Jum il-Ħaddiem, quddiem familji li mlew Pjazza Kastilja, il-Belt, biex jisimgħu l-messaġġ tal-Prim Ministru, Robert Abela ta l-kelma tiegħu li l-familji u n-negozji Maltin u Għawdxin se jibqgħu jsibu Gvern ta’ spalla.
Dan bħalma diġà sabu fl-aħħar snin quddiem sfidi kbar u bla preċedent.
Dr Abela qal li, bħalma għamel fl-aħħar snin, dan il-Gvern se jibqa’ jieħu d-deċiżjonijiet.
Qal, “Sa din il-ġimgħa stess, il-Kabinett tal-Ministri approva għajnuna diretta lill-importaturi biex inżommu stabbli l-prezz tad-dqiq li jintuża f’bosta affarijiet essenzjali. Għajnuna li tlaħħaq il-miljuni bil-kundizzjoni ċara li tagħmel tajjeb għall-effett tal-gwerra, u ma jgħollux il-prodotti essenzjali. Dan wara li fl-aħħar xhur konna diġà għenna bis-saħħa lill-importaturi tal-ġwież. Dak kollu li l-Gvern jista’ jagħmel se jagħmlu. B’għaqal u bl-użu tal-finanzi tal-pajjiż b’responsabilità.”
Il-Prim Ministru spjega kif fl-Ewropa, l-inflazzjoni laħqet l-ogħla rati li qatt ġew osservati fl-istorja.
F’Malta wkoll kellna żieda, iżda r-rata tal-inflazzjoni f’pajjiżna hija kważi n-nofs ta’ dik fl-Ewropa.
Dr Abela fakkar kif l-akbar rata ta’ inflazzjoni fl-istorja ta’ pajjiżna kienet fl-elfejn u tmienja, u din hija l-ikbar xhieda ta’ kif Gvern Laburista jagħmel minn kollox biex jipproteġi lill-ħaddiem.
Qal, “Taħt amministrazzjoni Nazzjonalista, is-sors tat-tbatija kien il-Gvern. Taħt amministrazzjoni Laburista, is-sors tas-sostenn huwa l-Gvern. Din hi d-differenza bejn is-suċċess u l-falliment. Aħna Gvern tal-poplu li jemmen fil-poplu u li jaħdem għalih. U għax nagħmlu dan, għax ninvestu u mhux nixxaħħu, għax l-ispiża qlibnieha f’investiment, minflok pajjiżna jmur lura, pajjiżna jkun jista’ jibqa’ miexi ’l quddiem.”
Il-Mexxej Laburista fakkar f’dak li wiegħed sa mill-ewwel mumenti li ngħata l-ewwel mandat tiegħu: li jservi b’umiltà.
Huwa qal li l-bieb huwa miftuħ għal kulħadd; għal kull min għandu x’joffri lil pajjiżna.
Qal, “Ejja negħlbu x-xettiċiżmu b’attiviżmu, li meta jħalli r-riżultat mixtieq jagħmilna sodisfatti li qed inħallu pajjiż aħjar mhux biss għalina iżda wkoll għal ġenerazzjonijiet futuri. Lilkom li appoġġjajtu lill-Oppożizzjoni fl-aħħar elezzjoni. Dik għażla li nirrispettawha. Però naf sew li fostkom illum hemm nies li tinsabu diżappuntati bil-Partit Nazzjonalista aktar milli kontu sa qabel is-sitta u għoxrin ta’ Marzu. Tħallux dak id-diżappunt iwaqqafkom milli tikkontribwixxu għall-pajjiż. Qalbna hija miftuħa għalikom ukoll. Għax dan pajjiż li ma jista’ jitlef il-kontribut ta’ ħadd.”
F’messaġġ skjett imma ċar, il-Prim Ministru qal li hu, flimkien mal-Kabinett, jinsabu ffukati biss fuq kif se jkompli jinħoloq il-ġid.
Biex dan isir, qal Robert Abela, irridu naħdmu flimkien, Għawdxin u Maltin kollha, irrispettivament mit-twemmin politiku.
Qal, “Il-fiduċja li ksibna fl-elezzjoni ġenerali lilna mlietna b’aktar enerġija u ħeġġa biex naħdmu aktar. Mill-bqija nibqgħu saqajna mal-art, fl-istess ħin li wrejna li dan il-moviment għadu b’saħħtu u se jibqa’ b’saħħtu. Nemmen li ma’ kull ġurnata, dan il-moviment jista’ jissaħħaħ. Kull filgħodu x’ħin nidħol għax-xogħol hawn f’dan il-bini ta’ warajja, nidħol bil-ħsieb f’moħħi li dik hija ġurnata ġdida fejn irridu naħdmu għall-fiduċja tal-poplu daqs l-ewwel ġurnata.”
Fil-qofol tad-diskors tal-Prim Ministru, spikkat it-tema ta’ ‘Malta Flimkien’, l-istess tema li tat lill-Partit Laburista l-ikbar rebħa elettorali fl-istorja ta’ Malta sovrana.
Il-ħidma flimkien, b’umiltà, hija dik li se tfassal futur isbaħ għal pajjiżna.
