“Importanti li dan il-Gvern jibqa’ jgħin lin-nies. Dan huwa prinċipju li dan il-Gvern huwa konvint fih.”
Stqarr dan il-Prim Ministru u Mexxej tal-Partit Laburista Robert Abela waqt intervista fuq l-istazzjon ONE, il-Ħadd filgħodu.
Fil-fatt, huwa kien mistoqsi fuq diversi suġġetti fosthom l-viżjoni ekonomika għall-għaxar snin li ġejjin li tnediet ftit tal-ġranet ilu u li hija msawra fuq ħames prinċipji differenti, fosthom l-edukazzjoni.
Hawnhekk irrimarka l-importanza ta’ aktar ħidma f’dan il-qasam. Fakkar f’miżura partikolari li nieda Gvern Laburista biss ftit tal-jiem ilu li se tinċentiva l-apprentistat.
Il-Prim Ministru stqarr: “Dan l-investiment li għamilna fl-apprentistat li huwa wieħed qawwi, qed nitkellmu kważi €3 miljun propju biex inti tkun tista’ tagħti dik l-exposure meħtieġa lil dawk l-istudenti li jkunu għadhom tilgħin u mexjin ’il quddiem fil-karriera tagħhom. Tagħtihom l-esperjenza meħtieġa imma mbagħad fl-aħħar mill-aħħar ukoll li lil min iħaddem tagħtih nies mimlijin b’talent u riżorsi.”
Fuq l-ekonomija, il-Prim Ministru rrimarka wkoll il-ħidma tal-Gvern sabiex jipproteġi l-futur ekonomiku ta’ pajjiżna. Dan f’aktar minn sena ta’ pandemija li ħasdet lid-dinja u xekklet il-finanzi ta’ kull pajjiż.
Minkejja dan il-Prim Ministru sostna li l-Gvern dejjem baqa’ ta’ spalla għan-negozji. Dan fost oħrajn bil-pjan ta’ riġenerazzjoni ekonomika fejn fih tħabbru miżuri bħal dik tat-tnaqqis fit-taxxa tal-boll fuq xiri ta’ propjetà. Miżura li permezz tagħha kellna xhur sħaħ ta’ rekord wara ieħor ta’ xiri ta’ propjetajiet u li issa reġgħet ġiet estiża.
Dr Abela spjega b’mod tanġibbli l-benefiċċju ta’ din il-miżura filwaqt li saħaq kif permezz ta’ din l-azzjoni f’waqtha, il-Gvern ipproteġa l-valur tal-propjetà hekk kif kien hemm tnaqqis marġinali.
Huwa sostna: “Kelli ħabib tiegħi li qalli dak li franka f’taxxa investih fi kċina għall-post u dak li kien se jkollu jissellef biex jixtri kċina, bit-traħħis fit-taxxa li kellu, seta’ jixtri l-kċina. Dak ifissru dawn il-miżuri.”
Il-Prim Ministru fakkar ukoll fl-għajnuna li ta l-Gvern lin-negozji f’dan iż-żmien ta’ sfida. Għajnuna li issa qed narawha tissarraf f’aktar investiment minn kumpaniji stabbiliti f’pajjiżna minkejja li ninsabu f’pandemija.
Dr Abela saħaq: “Qed jimxu wara l-kuraġġ tal-Gvern u li l-kuraġġ li wera l-Gvern tul l-aħħar xhur huma qegħdin jirkbu fuqu u qed jibqgħu jinvestu. Jiena nweġibhom bil-kontra. Jien ngħidilhom li l-Gvern qed jirkeb fuq il-kuraġġ tagħkom u dik hija r-realtà.”
Tul id-diskussjoni, il-Prim Ministru tkellem ukoll dwar il-qasam ambjentali fosthom l-importanza li l-Gvern jassigura ekonomija ħadra u sostenibbli. B’hekk aċċenna għall-ħidma tal-Gvern li jaħdem biex jilħaq il-miri li stabilixxa sabiex Malta tkun newtrali mill-emmissjonijiet tal-karbonju sal-2050.
Dr Abela spjega kif il-Gvern irid jibqa’ jinċentiva l-qalba favur aktar vetturi elettriċi. Dan filwaqt li jgħin inaqqas ukoll l-emmissjonijiet mill-qasam tal-kostruzzjoni permezz anke tal-ħidma mill-Awtorità tal-Bini u l-Kostruzzjoni li twaqqfet riċentament.
Aċċenna wkoll għas-sitwazzjoni tal-Covid-19 bħalissa f’pajjiżna. Tenna s-sodisfazzjoni tiegħu għall-fatt li r-rata ta’ infezzjonijiet qed tinżamm taħt kontroll madankollu rrimarka l-importanza li nibqgħu kawti speċjalment meta naraw pajjiżi oħra li fetħu u li bdew jaraw żieda sostanzjali fir-rata ta’ infezzjonijiet.
Huwa sostna: “Nemmen li jkun aktar għaqli li nibqgħu nimxu b’dan il-prinċipju li passi meqjusa forsi żgħar imma wieħed li jibni fuq l-ieħor u neliminaw jew nimminimizzaw kemm jista’ jkun is-sogru li jaf ikollna nreġġaw lura. Dak jibqa’ hemmhekk dak is-sogru. Imma rajna pajjiżi oħrajn fejn kellhom reopening plan ippjanat u kellhom jimbuttawh ’il quddiem.”
