Żgħażagħ Laburisti jilqgħu b’sodisfazzjon l-aħbar li l-Gvern se jkun qed iwessa’ l-miżura tal-equity sharing sabiex iżjed żgħażagħ jkollhom l-opportunità jsiru sidien ta’ darhom. Dan huwa pass importanti li jkompli juri l-impenn ta’ dan il-Gvern biex jgħin lill-ġenerazzjoni żagħżugħa tibni l-futur tagħha b’aktar sigurtà u stabbiltà.
Bil-bidla li tħabbret mill-Prim Ministru Robert Abela nhar il-Ħadd li għadda, żgħażagħ minn 25 sena ‘l fuq se jkunu jistgħu jibbenefikaw minn din l-iskema, li s’issa kienet tapplika għal dawk li għandhom minn 30 sena ‘l fuq. Dan iġib fix-xejn il-kritika tal-Oppożizzjoni għax juri kemm il-Gvern qed jagħraf il-ħtiġijiet u l-prijoritajiet reali taż-żgħażagħ f’pajjiżna.
Din l-aħbar, ħa timplimenta miżura oħra mill-Manifest Elettorali ‘Malta Flimkien’, tikkumplimenta miżuri oħra bħal dik tal-First Time Buyers. Filfatt, s’issa 4,909 households ibbenefikaw mill-miżura tal-€1,000 kull sena għal għaxar snin għall-propjetajiet mixtrija fl-2022 u 2023, bi ftit iktar minn nofshom diġà rċivew it-tieni pagament. Din tal-aħħar kienet miżura ewlenija fil-kampanja elettorali tal-2022 li qiegħda tiġi implimentata, kif kien imwiegħed.
Żgħażagħ Laburisti jinnotaw ukoll illi, kuntrarju tan-narrativa qarrieqa tal-Partit Nazzjonalista, 53% ta’ dawk li bbenefikaw mill-iskema tal-First Time Buyers, xtraw il-propjetà waħidhom.
Fl-istess ħin, ninnotaw ukoll il-ħidma kontinwa fuq proġetti ta’ housing affordabbli. Dan hu dak li ż-żgħażagħ jistennew mit-tmexxija tal-pajjiż – viżjoni ċara li ttaffi l-piżijiet u tagħtihom iċ-ċans jibnu ħajja indipendenti u sostenibbli.
