Fi stqarrija l-Partit Laburista qal li llejla assistejna għal differenza ċara bejn il-Gvern u l-Oppożizzjoni fl-ogħla istituzzjoni tal-pajjiż.
Fuq naħa l-Gvern li vvota favur:
i. l-investiment fin-nies bl-aqwa Budget fl-istorja li ta fost oħrajn żidiet qawwija lill-familji u l-akbar tnaqqis fit-taxxa
ii. mozzjoni li tikkundanna aġir diżgustanti fil-konfront tal-Ispeaker
iii. emenda li taqta’ l-abbuż mill-għodod tal-ġustizzja.
Fuq in-naħa l-oħra, rajna Oppożizzjoni li tivvota kontra l-familji Maltin u Għawdxin. Għax mifrudin, ma kinux kapaċi jiddikjaraw il-vot tagħhom fuq l-aġir tal-Kap vera li jmexxi l-Oppożizzjoni Nazzjonalista llum il-ġurnata.
Dan filwaqt li għax iddettati mill-fazzjoni estremista li poġġietu Kap, Bernard Grech ma kienx kapaċi jinħaqad mal-Gvern fuq riforma importanti li ma tiċħad l-ebda jedd liċ-ċittadin, anzi televah. Minflok ħa n-naħa tal-fazzjoni li ma riditx lill-pajjiż jindirizza abbużi li jsallbu lin-nies għalxejn xejn b’xejn. Kif iddikjaraw, riedu jibqgħu jħallu allegazzjonijiet, saħansitra li tisma’ fil-bar, jibqgħu jintużaw biex ikissru lin-nies. Dan iriduh akkost ta’ kollox anki jekk kif rajna fl-aħħar xhur u ġimgħat, ħarġu ta’ giddieba ċċertifikati.
Partit Laburista fil-Gvern se jkompli jmexxi b’politika ta’ bidliet favur in-nies u kontra l-mibegħda. Fuq kollox politika ta’ investiment u ġid fin-nies bħall-aħħar miżuri li ħabbar fl-aħħar jiem il-Prim Ministru Robert Abela, fosthom miżura li tgħin żgħażagħ minn 25 sena ’l fuq biex isiru sidien ta’ darhom billi l-Gvern jgħin fix-xiri ta’ proprjetà u l-miżura li tgħin ġenituri ta’ wlied b’diżabilità servera biex possibbilment ikollhom pensjoni.
Gvern Laburista jfisser futur aħjar għall-ġid tal-Maltin filwaqt li l-Oppożizzjoni, għax maħkuma minn min moħħu jħabbat bil-borom, illum intilef fil-partiġġjaniżmu sfrenat u qed jieħodha head-on kontra l-poplu.
