Grupp ta’ kaċċaturi kmieni dalgħodu salvaw numru ta’ għasafar, ċief, li sfaw vittmi ta’ snanar li kienu f’wiċċ il-baħar.
It-tliet persuni, li ħaqqhom kull tifħir għal din l-azzjoni f’waqtha, Matthew Chetcuti, Andre Abela u Donald Vassallo, lemħu ‘l fuq minn 15-il ċiefa waqt li kienu fuq il-baħar.
Hekk kif resqu lejn l-għasafar innutaw li kienu maqbuda fi snanar tas-sajf fil-wiċċ.
Kienu bosta li faħħru l-ġest ta’ dawn il-kaċċaturi, li minkejja kultant jitpoġġew f’dawl ikrah minħabba l-azzjoni ta’ persuna waħda, ġesti bħal dawn ġieli jiġu minsija.
