Il-Kap tal-Partit Nazzjonalista Bernard Grech qal li m’attendiex għaċ-ċerimonja uffiċjali ta’ Jum il-Ħelsien, għax kellu impenji oħra.
Dan l-istazzjon staqsa lill-Kap innifsu għar-raġuni li għażel li ma jattendix fl-attività annwali quddiem il-monument fil-Birgu.
Ġurnalist: “Dr Grech għalfejn m’attendejtx għaċ-ċerimonja uffiċjali tal-Ħelsien?”
Grech: “Kelli impenji oħrajn.”
Minflok il-Kap Nazzjonalista għażel li jibgħat lil David Agius minfloku, li wasal fuq il-post proprju bil-karozza tal-Kap tal-Oppożizzjoni. Deċiżjoni li ġiet deskritta bħala bojkott għaċ-ċerimonja nazzjonali, simili għal kif kien isir mill-Partit Nazzjonalista bejn l-1987 u l-1999.
Dan l-aġir ta’ Grech din il-ġimgħa wkoll ġie ftit tal-jiem wara li l-Partit Nazzjonalista tellaq attakk, saħansitra bis-Segretarju Ġenerali l-ġdid tiegħu, dwar il-festival ‘Mużika Mużika’, minħabba l-fatt li waqtu tkantat il-kanzunetta ikonika ‘Tema 79’.
Dan l-istazzjon staqsa wkoll lid-deputati Nazzjonalisti dwar jekk jaħsbux li din il-mossa minn Grech kinitx żball kbir għal xi ħadd li jaspira li jkun Prim Ministru tal-pajjiż.
Fost dawk li staqsejna kien hemm id-Deputat David Agius innifsu, li kompla mat-tweġibiet, jew nuqqas tagħhom, fil-konfront ta’ ONE News.
David Agius: “Irranġaw l-istorja li għamiltu.”
L-aġir ta’ Grech wassal biex id-deputati tiegħu stess ikunu skomdi jwieġbu dwar ir-raġuni li ma marx għaċ-ċerimonja uffiċjali tal-Ħelsien. Fost dawn kien hemm id-Deputat Għawdxi Alex Borg li, minkejja li fuq Facebook tella’ post jitkellem dwar l-importanza tal-Ħelsien, naqas milli jwieġeb il-mistoqsija li għamilnielu.
Alex Borg: “Grazzi”
Id-Deputata Eve Borg Bonello wkoll kienet fost dawk li baqgħu deħlin fil-binja tal-Parlament.
Madankollu, id-Deputat Darren Carabott, filwaqt li ma weġibx jekk dak li għamel Grech kienx żball, qalilna li ntbagħat rappreżentant floku.
Darren Carabott: “Kien hemm ir-risposta ċara u kien hemm rappreżentant tal-Partit ukoll.”
