Il-Kap Nazzjonalista, Bernard Grech, baxxa rasu u kien kostrett jiġbed il-ħabel tal-għaqda Repubblika wara l-ġlied kbir li qam minħabba l-kummenti ta’ Joe Giglio fuq ir-Russa Maria Efimova.
Mat-Times, kelliem għall-Partit Nazzjonalista sostna li, dwar id-dubji li qajjem Giglio fuq Efimova, il-pożizzjoni kemm tal-partit kif ukoll tal-Kap Bernard Grech ma tirreflettix dan.
Fi tweġiba li Bernard Grech ta lill-gazzetta The Times, deher evidenti ħafna li għaddiet ta’ Repubblika u li ġiet imposta pożizzjoni ta’ x’għandu jgħid il-Kap.
Nies qrib id-Dar Ċentrali qalulna li dan sar minn dawk li huma fost l-aktar qrib tal-għaqda Repubblika, fosthom Karol Aquilina u David Casa, li kienu fost l-ewlenin li ħarġu kontra Giglio wara li dan tkellem fi programm fuq ir-radju tal-Knisja.
Bħala Avukat, Joe Giglio kellu każ kontra Maria Efimova u fi programm fuq ir-radju ġie mistoqsi dwarha.
Giglio dlonk tefa’ dubji dwar Efimova, li fost oħrajn sabet lil David Casa bħala alleat kbir tagħha.
Giglio ddeskriva lil Efimova b’aġġettivi iebsa.
Dan wassal għal reazzjoni kontra tiegħu, bid-Deputat Karol Aquilina u l-EwroParlamentari David Casa nnifsu juru pubblikament li ma jaqblux ma’ Giglio.
Karol Aquilina, li fl-aħħar elezzjoni kellu jikkuntenta b’siġġu parlamentari b’elezzjoni każwali minħabba s-saħħa li kiseb Giglio, fid-distrett, saħaq li kliem bħal ta’ Giglio jinsulta l-memorja ta’ Daphne Caruana Galizia.
L-istess qal Casa lil Giglio, filwaqt li l-għaqda Repubblika, immexxija minn ħu Karol Aquilina, ħarġet stqarrija li fiha akkużat lil Giglio li lil Effimova kien ippersegwitha.
Ta’ Repubblika żiedu jgħidu li mhumiex sorpriżi bl-aġir ta’ Joe Giglio u, filwaqt li ġew imfakkra r-rabtiet ta’ Giglio mal-bank Pilatus, id-dikjarazzjoni tal-Avukat u Deputat Nazzjonalista ġiet deskritta bħala tal-waħx.
Din mhux l-ewwel darba li Bernard Grech kellu jgħid ‘Yes Sir’ lil ta’ Repubblika u d-Deputati qrib tagħha.
Lil Karol Aquilina ħatru Kelliem għall-Ġustizzja fuq insistenza tan-nies ta’ Repubblika u, meta kien hemm nies qrib Adrian Delia, dejjem għaddiet ta’ Repubblika, billi Bernard Grech kull ma kellu jagħmel hu biss li jagħti l-barka.
Hekk ġara fil-każ ta’ Andrè Grech, alleat ta’ Delia u li rriżenja mill-Partit Nazzjonalista wara ġlied kbir bejn il-fazzjonijiet differenti.
Fuq dan, ta’ Repubblika kienu ħarġu jifirħu li André Grech żarma mill-Partit Nazzjonalista, bil-Kap Bernard Grech jarmih f’kummenti mal-midja meta qal li jibqa’ fil-partit tiegħu min irid jaħdem għall-pajjiż.
