Gzira United u Balzan temmew il-konfront ta’ bejniethom fi draw ta’ 1-1, fejn madankollu, meta wieħed jieħu nota tad-90 minuta, jista’ faċilment jinnota li dan kien punt mirbuħ minn Balzan u tnejn mitlufa mill-Maroons.
Dan hekk kif mingħajr ebda dubju, kienu Gzira l-aħjar tim fil-partita speċjalment fl-ewwel taqsima, għalkemm Balzan wettqu reazzjoni tajba fit-tieni taqsima u kellhom il-mumenti pożittivi tagħhom ukoll.
Kienu Gzira li ħarġu fuq l-offensiva u fis-sitt minuta, iż-żagħżugħ Brookyln Borg, kellu x-xutt tiegħu minn pożizzjoni angulata li ntemm ftit barra. Huma komplew jiddettaw il-logħob u fis-26 minuta resqu viċin li jiftħu l-iskor iżda wara li rċieva minn cross mix-xellug, Lucas Macula, ma rnexxielux jagħmel kuntatt mal-ballun.
Kulma jmur kompla d-dominju assolut tal-Maroons, u żewġ minuti biss wara kellhom ferħa bla temma meta minn azzjoni ta’ corner Lucas Macula permezz ta’ daqqa ta’ ras mill-viċin tefa’ ġewwa iżda r-referee Matthew de Gabriele kien pront u ħassar il-goal minħabba li nnota foul fl-attakk tal-Maroons.
Attakk wara l-ieħor, fid-39 minuta Gzira meritatament u finalment fetħu l-iskor meta LUCAS MACULA approfitta minn indeċiżjoni ta’ Jan Busuttil, avvanza tajjeb u permezz ta’ xutt fil-baxx minn ġol-kaxxa għeleb għal kollox lill-goalkeeper ta’ Balzan, Danilo Golovic.
Balzan ħarġu aħjar fit-tieni taqsima u fid-49 minuta xutt mid-distanza ta’ Nikola Braunovic intemm barra.
Gzira wieġbu fl-54 minuta meta Thaylor Aldama għadda tajjeb lejn Lucas Macula li kellu x-xutt mill-ewwel tiegħu minn ġol-kaxxa jintemm barra.
Mas-siegħa logħob, il-captain ta’ Gzira Zachary Scerri ttanta xortih permezz ta’ xutt minn tarf il-kaxxa li iżda ġie salvat tajjeb minn Golovic.
Iżda kontra x-xejra tal-logħob, Balzan, ġabu l-iskor indaqs erba’ minuti wara ta’ xutt b’saħħtu minn barra l-kaxxa tan-neo-akkwist Belġjan OLIVIER ROMMENS, li ma ta l-ebda ċans lill-goalkeeper Kroat tal-Maroons, Darijan Zarkov, bil-ballun jintemm fir-rokna tax-xibka.
Balzan ipprotestaw għall-penalty fis-76 minuta meta s-sostitut Han Euigwon deher jitwaqqa’ minn player avversarju iżda r-referee Matthew De Gabriele ħalla l-logħob għaddej.
Huma komplew jippressaw u fil-85 minuta, Han Euigwon impenja lil Zarkov permezz ta’ xutt mid-distanza li ġie salvat tajjeb minn dan tal-aħħar.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Matthew Degabrielle
BOV Plejer tal-Logħba: Lucas Macula (Gzira U.)
