L-Eks Prim Ministru Nazzjonalista Lawrence Gonzi reġa’ rrikorra għal Facebook biex jeħodha kontra l-kritiċi tiegħu għall-attakki li welled ftit jiem qabel dwar il-qagħda attwali fil-pajjiż, partikolarment fit-turiżmu.
Minkejja dan, fl-aħħar post tiegħu, imkien ma rrefera għall-kritika li saritlu wara li, fl-istess kumment preċedenti, kien attakka lill-imsieħba soċjali fil-Kunsill Malti għall-Iżvilupp Ekonomiku u Soċjali (MCESD) u ddeskrivihom bħala “bla sugu u ta’ ebda ġid”.
Bis-silenzju tiegħu issa, anke jekk ġie kkritikat dwar dan fl-aħħar jiem ukoll, Gonzi donnu ried iżomm sod ma’ dawk il-kummenti ftit jiem qabel, jiġifieri kif ħadd mir-rappreżentanti fl-ogħla forum nazzjonali fil-pajjiż mhu qed jiftaħ ħalqu dwar ċirkostanzi attwali.
Il-gazzetta KullĦadd, fl-aħħar ħarġa tagħha, fakkret kif din l-istess retorika fil-konfront tal-MCESD kien jużaha wkoll Austin Gatt, waqt li kien Ministru fl-aħħar Kabinett ta’ Gonzi stess. Austin Gatt kien irrefera għall-MCESD bħala ħanut tal-kafè fejn kulħadd ifajjar id-diskors bl-addoċċ, bla ma joħroġ xejn sura, u dak iż-żmien laqqmu bħala “tat-titotla”.
Gonzi issa fl-aħħar post wieġeb biss għall-kritika li saret f’artiklu tal-MaltaToday u waqt li ma semmihomx direttament irrefera għall-gazzetta bħala “xi wħud”.
Fil-MaltaToday inġibdet l-attenzjoni li l-kritika ta’ Gonzi ma treġix, iżjed u iżjed wara li kien hu stess li introduċa l-linji tal-ajru low cost f’pajjiżna.
Attwalment il-Partit Nazzjonalista qed jikkritika l-ammonti ta’ turisti li qed jaslu fostna, mhux l-inqas issa wara l-pandemija li għalqet l-ajruporti madwar id-dinja kollha.
Fost l-ewwel pajjiżi li esperjenzaw irkupru fuq l-2019, Malta llum qed tesperjenza livelli rekord ta’ turisti li l-istorja nazzjonali qatt irreġistrat, b’riżultat tal-ħidma ta’ Gvernijiet Laburisti fl-aħħar snin. Gonzi wkoll ittanta jieħu l-mertu fuq dan.
Fil-kumment preċedenti tiegħu, Gonzi kien irrefera għal artikli fil-gazzetta The Sun, li tennew li Malta saret xi kalamita “għall-alkoħol bl-irħis u ħaxixa legali”, avolja Gonzi stess konxju li dawn ma jirriflettux il-qagħda reali tal-miljuni ta’ turisti li jżuruna.
Waqt li ftaħar bil-politika tal-aħħar amministrazzjoni tiegħu, li skontu saħħet l-ekonomija, għamel suċċess mis-sħubija fl-Unjoni Ewropea u ta lill-pajjiż fama internazzjonali, Gonzi wkoll mera l-fatti storikament magħrufa. – SHOW Gonzi Post: “Taf x’naf li fi żmienna t-turiżmu kiber, l-ekonomija ssaħħet, ftaħna setturi ekonomiċi ġodda fjamanti, investejna fl-edukazzjoni, għamilna suċċess mis-sħubija fl-Unjoni Ewropea, daħħalna l-ewro mingħajr skossi, rbaħna fama tajba u Malta kienet imfittxija għal dak li jagħmilha tassew speċjali u unika fil-Mediterran.”
Dak iż-żmien l-ekonomija qatt ma kienet daqshekk ħażina, tant li Malta kienet spiċċat taħt il-Proċedura Ewropea ta’ Defiċit Eċċessiv, waqt li l-investiment dirett barrani kważi sparixxa. Il-KullĦadd fakkret ukoll kif, minn tmiem dik il-leġiżlatura, Gonzi baqa’ magħruf għall-kumpanija Brażiljana fantażma li kellha tirriloka f’Tas-Sliema, iżda minflok waslet biss sa uffiċini vojta.
Fost oħrajn, ikkummentalu wkoll, għall-aħħar messaġġ tiegħu, l-Eks Ministru għall-Ambjent George Pullicino.
Il-moħħ wara l-akbar sfreġju ambjentali fil-pajjiż f’dik l-istess amministrazzjoni ta’ GonziPN, b’riperkussjonijiet li għadhom jinħassu sal-lum, kompla fuq l-Eks Prim Ministru b’iżjed tgħawwiġ tal-fatti.
Hu rrefera għall-kriżi finanzjarja tal-2008 u l-2009, avolja hu sew magħruf li din bilkemm affettwat lil pajjiżna u qatt ma tista’ titqabbel mal-kriżijiet li feġġew fl-aħħar snin bil-pandemija tal-COVID-19 u l-Gwerra fl-Ukrajna.
Pullicino SOT:
“U dan kollu li semmejt inkiseb minkejja li d-dinja kienet għaddejja mill-akbar kriżi ekonomika fl-aħħar mitt sena. Qisu kulħadd jinsa minn xiex konna għaddejna.”
Minkejja dan, kien biss fl-aħħar żminijiet li pajjiżna rnexxielu jikseb l-aqwa riżultati, li donnu nisslu l-għira f’Gonzi u l-amministrazzjoni li mexxa sal-2013, tant li llum qed ingawdu anke rekords fejn jidħol ix-xogħol, il-qgħad, l-ekonomija, l-investimenti u t-turiżmu, fost ħafna oħrajn.
