Ic-champions Hamrun Spartans bdew l-impenji tagħhom fl-aħħar fażi tal-kampjonat fuq nota pożittiva wara rebħa b’goal uniku fuq Birkirkara f’logħba li prattikament ġiet deċiża f’nofs it-tieni taqsima.
Kien fl-64 minuta meta d-difensur Karkariż Neil Micallef intwera karta ħamra diretta mir-referee Matthew De Gabriele għal dak li deher foul professjonali billi żamm il-ballun b’idu ftit barra l-kaxxa biex waqqaf azzjoni li setgħet tissarraf f’goal għal Hamrun. Mill-freekick li rriżulta wasal il-goal deċiżiv li ta r-rebħa u t-tliet punti lill-Ispartans.
Sa minn kmieni deher li l-logħba se tkun waħda ferm bilanċjata u missielta biż-żewġ naħat determinati li ma jċedu xejn.
L-ewwel azzjoni perikoluża waslet fit-12-il minuta meta Roko Prsa nkariga ruħu minn freekick għal Hamrun bix-xutt tiegħu jiġi salvat f’corner mill-goalkeeper Karkariż Giacomo Volpe.
Birkirkara wieġbu fil-21 minuta bi kross ta’ Stephane Donovan Makoma u daqqa ta’ ras mill-qrib ta’ Maxuell Maia li l-goalkeeper Henry Bonello dawwar f’corner.
Mill-corner mogħti minn Paul Mbong, Bonello salva d-daqqa ta’ ras ta’ Alessandro Coppola u kien pront tefa’ l-ballun ‘il fuq lejn Joseph Mbong li avvanza qabel daħal fil-kaxxa u wiċċ imb’wiċċ mal-goalkeeper Volpe llobbja l-ballun li ħabat mal-lasta.
Fis-27 minuta Volpe salva tajjeb freekick mogħti minn Raphael Lopes Silva, filwaqt li fid-39 minuta reġgħu kienu l-Ispartans li heddew bi kross ta’ Abdoul Kairou Amoustapha li ġie mxellef f’corner minn Agustin Sandona qabel seta’ jieħu l-ballun Raphael Lopes Silva.
Fil-ħin miżjud qabel intemmet l-ewwel taqsima Yipke Gnamien kellu ċans tajjeb għal Birkirkara imma minn qagħda tajba xxuttja għoli.
It-tieni taqsima dehret li se tkompli fuq l-istess ritmu bil-Karkariżi joħolqu l-ewwel periklu fid-49 minuta meta minn corner ta’ Paul Mbong, is-sostitut Tomislav Papazov kellu d-daqqa ta’ ras salvata minn Bonello.
Fl-64 minuta wasal l-inċident li prattikament iddeċieda l-logħba fejn id-difensur Karkariz Neil Micallef tkeċċa u mill-freekick li rrizulta Roko Prsa għeleb għal kollox lill-Volpe.
Hamrun ikkontrollaw tajjeb il-vantaġġ minimu li kellhom minkejja l-isforzi ta’ Birkirkara, li b’raġel anqas, ippruvaw isalvaw ir-riżultat.
Iżda fil-ħin miżjud Birkirkara saħansitra spiċċaw jilghabu b’9 players meta l-captain Alexander Satariano tkeċċa wkoll għal żewġ karti sofor.
L-aħħar azzjoni ġiet minn Birkirkara iżda x-xutt ta’ Alessandro Coppola ġie salvat minn Bonello.
Referee: Matthew Degabrielle
Plejer tal-Logħba: Roko Prsa (Hamrun S.)
