Zabbar St Patrick għelbu lil Naxxar Lions permezz ta’ goal f’kull taqsima biex telgħu jaqsmu l-ewwel post tal-Bottom 6 ma’ Hibernians bi 17-il punt waqt li ħallew lil-Lions ankrati fl-aħħar post b’10 punti flimkien ma’ Melita.
Kien riżultat pjuttost qarrieqi għax Naxxar kellhom il-mumenti tagħhom imma Zabbar approfittaw aħjar mill-azzjonijiet li kellhom.
Naxxar ħolqu l-ewwel periklu fejn saħansitra sabu x-xibka wara erba’ minuti permezz ta’ Edward Bolanos imma l-goal ġie mħassar għal offside.
Għal ħafna ħin il-logħob kien konċentrat f’nofs il-ground sakemm fid-29 minuta St Patrick fetħu l-iskor meta Diogo Joao Tavares għeleb lill-goalkeeper Matthias Debono b’xutt fil-baxx għar-rokna.
Naxxar ippruvaw iwettqu reazzjoni imma l-aktar li resqu qrib kien fis-37 minuta meta Nikolai Micallef ikkrossja għan-nofs imma l-goalkeeper Zabbari Luca Camilleri nterċetta fil-ħin biex waqqaf l-azzjoni.
Fit-tieni taqsima Naxxar reġgħu ħarġu fuq l-attakk u fis-57 minuta xutt ta’ Bolanos ġie salvat f’corner minn Camilleri.
Iżda għalkemm il-Lions komplew jippruvaw jiksbu l-goal tad-draw, Zabbar bdew joperaw bil-kontrattakki u rnexxielhom jirduppjaw fit-78 minuta meta l-goalkeeper Debono salva f’corner xutt mill-qrib ta’ David Souza Oliveira, iżda mill-corner mogħti minn Tavares, kien l-istess Souza Oliveira li bir-ras tefa’ l-ballun fir-rokna tax-xibka biex irdoppja l-vantaġġ taz-Żabbarin.
Fit-82 minuta Naxxar resqu qrib li jnaqqsu l-marġini iżda l-goalkeeper Camilleri mblokka xutt mill-qrib ta’ Takuma Yamaguchi.
Referee: Emanuel Grech
Plejer tal-Logħba: Diogo Joao Tavares (Zabbar St Patrick)
