Fl-ewwel logħba tal-Ħadd fit-Tony Bezzina Stadium, Sliema Wanderers irreġistraw it-tielet rebħa staġjonali u taw ir-raba telfa lill-Marsaxlokk meta għelbuhom bl-skor minimum ta’ 1 – 0. Sliema kienu domminanti fl-ewwel taqsima żda Marsaxlokk tjiebu fit-tieni waħda pero ma’ rnexxilhomx ikunu perikolużi biżżejjed sabiex jieħdu xi ħaġa mill-konfront.
Wara tlett minuti waslet l-ewwel azzjoni ta’ nota meta minn indeċiżjoni fid-difiża ta’ Marsaxlokk, approfita Samuel Gomez Da Mata li mill-viċin ra l-konklużjoni tiegħu tiġi salvata minn Marko Drbonjak.
Fid-disa minuta Sliema marru fil-vantaġġ meta Myles Beerman wettaq xogħol tajjeb mix-xellug, ballun wasal għand Vito Plut li b’ċerta intelliġenza niżżel lejn Wescley Matos Da Silva li b’konklużjoni sabiħa poġġa l-ballun fix-xibka.
Sliema komplew fuq l-offensiva u mal-kwarta logħob free-kick ta’ Steve Pisani ġie salvat b’mod eċċelenti minn Drobnjak. Il-Wanderers komplew jiddominaw u fl-24 minuta kross ta’ Myles Beerman u Wescley Matos Da Silva xeħet inkredibilment għoli minn taħt il-lasta.
Sekondi wara tasal l-ewwel azzjoni perikoluża ta’ Marsaxlokk meta x-xutt ta’ Jose Ulises Arias għadda kemm kemm għoli.
Ħames minuti qabel l-intervall Samuel Gomez Da Mata ta’ Sliema ħareġ l-aħjar tal-goalkeeper Marko Drobnjak meta x-xutt bid-dawra tiegħu ġie mdawwar f’corner biex Sliema daħlu jistrieħu b’vantaġġ ta’ goal.
Marsaxlokk fetħu tajjeb fit-tieni taqsima hekk kif wara biss tmien minuti setgħu faċilment ġabu d-draw iżda l-konklużjoni fil-baxx ta’ Yuri De Jesus Messias ġiet salvata perfettament minn Kelvin Agu Emeka fil-lasti ta’ Sliema.
Rispota ta’ Sliema mas-siegħa logħob meta xutt ċentrali ta’ Samuel Gomez Da Mata ġie salvat bla wisq diffikulta.
Kellna nistennew sal-82 minuta biex assistejna għal azzjoni perikoluża oħra meta l-konklużjoni tas-sostitut Patrick Nonato ġiet salvata b’diffikulta mill-goalkeeper ta’ Sliema Emeka qabel mad-difiża Slimiża klerjat l-periklu f’corner.
It-tim immexxi minn Paul Zammit irnexxilu jibqa fil-kontroll sal-aħħar tal-konfront biex b’hekk Sliema issa għandhom total ta’ għaxar punti wara erba partiti.
Referee: Philip Farrugia
Plejer tal-Logħba: Samuel Gomes Da Mata (Sliema W.)
