Goal fit-93 minuta skurjat minn Federico Falcone ta’ rebħa drammatika lil Hibernians f’konfront ferm divertenti kontra Melita b’erbgħa mill-ħames goals jiġu skurjati matul it-tieni taqsima.
Hibernians fetħu fuq l-attakk u ħolqu l-ewwel periklu fit-8 minuta meta xutt ta’ Jurgen Degabriele ġie mblukkat f’corner.
Fis-16-il minuta Giannis Bastianos kellu xutt imblukkat mill-goalkeeper Lubik biex mir-rebound Federico Falcone ixxuttja barra.
L-istess Falcone kien qrib ħafna li jiftaħ l-iskor minuta wara meta avvanza waħdu qabel ixxuttja fil-baxx iżda l-ballun ħabat ma’ sieq il-lasta.
Melita ma qagħdux lura u fit-22 minuta corner insidjuż ta’ Alan Borg Olivier ġie mblukkat tajjeb mill-goalkeeper Hugo Sacco, bl-istess Sacco jikklerja bil-ponn freekick ta’ l-istess Borg Olivier fit-28 minuta.
Hibernians marru fil-vantaġġ fil-41 minuta meta Federico Falcone skorja mill-qrib minn cross tajjeb ta’ Alex Bruno.
Fl-44 minuta l-istess Falcone seta’ rdoppja imma xxuttja barra minn qagħda tajba minn cross ta’ Bastianos.
It-tieni taqsima kienet ferm aktar movimentata tant li assistejna għal tliet goals fi spazju ta’ għaxar minuti. Kienu Melita li kisbu d-draw fis-47 minuta permezz ta’ daqqa ta’ ras mill-qrib ta’ Aldair Simanca minn corner mogħti minn Matthew Debattista.
Hibernians reġgħu marru fil-vantaġġ fit-52 minuta meta Jurgen Degabriele qassam fil-baxx lil Lucas Caruana li mill-qrib ma falliex.
Iżda Melita ma damux ma reġgħu skurjaw, eżattament fis-57 minuta, minn freekick ta’ Debattista kien Marc Van de Font li għamilhom 2-2.
Hibernians għafsu aktar mill-avversarji tagħhom fit-tentattiv li jerġgħu jmorru fil-vantaġġ u kellhom jistennew sat-93 minuta biex jiksbu rebha drammatika grazzi ghal cross ta’ Bastianos u daqqa ta’ ras ta’ Federico Falcone li spiċċat fix-xibka.
Referee: Ezekiel Barbara
Plejer tal-Logħba: Matthew Debattista (Melita)
