Il-kumpanija GO inawgurat il-Head Office Net Zero ġdid tagħha fiż-Żejtun b’investiment ta’ €20 miljun li jistabbilixxi livell ġdid għal spazji tax-xogħol sostenibbli u diġitalment avvanzati.
Il-binja, iddisinjata b’mod li tiżgura futur aktar ekoloġiku u jmexxu ’l quddiem it-trasformazzjoni diġitali tal-pajjiż, tirrifletti l-impenn ta’ GO li tkompli tiżgura l-vjaġġ ta’ Malta lejn ġejjieni aktar sostenibbli.
Il-Ministru għall-Ambjent, l-Enerġija u l-Indafa Pubblika, Miriam Dalli rrimarkat li l-impenn tal-Gvern lejn is-sostenibbiltà mhuwiex biss fit-tnaqqis tal-emissjonijiet iżda wkoll li jkompli jinvesti fil-ġejjieni. Hija sostniet li l-binja Net Zero ta’ GO hija pass ‘il quddiem, fejn it-teknoloġija moderna li għaliha GO hija magħrufa, qed tintrabat ma’ prattiċi ta’ enerġija responsabbli sabiex jinbena legat għall-ġenerazzjonijiet futuri.
Il-Kap Eżekuttiv ta’ GO Nikhil Patil, stqarr li l-għan ta’ GO huwa wieħed sempliċi, li jkomplu jibnu Malta diġitali u sostennibli. Huwa fakkar kif ħames snin ilu l-kumpanija investiet mitt miljun ewro li rat is-sistema fibre optic fid-djar u n-negozji kollha f’Malta, wieħed mill-ewwel pajjiżi fl-Ewropa li għamel dan.
Dawn l-uffiċini għandhom aktar minn 3,000 panneli solari li qed jiġġeneraw enerġija nadifa, iżda fiuq kollox qed jiġġeneraw biżżejjed elettriku daqs kemm jikkonsumaw 420 dar kull sena.
Il-kumpanija impenjat ruħha li tnaqqas l-emissjonijiet tal-karbonju b’42% sal-2030 u b’90% sal-2050.
Sadanittant, l-impenn ta’ GO għall-azzjoni klimatika daħal f’fażi ġdida bit-tnedija reċenti ta’ GO ENERGI, prodott ġdid iddisinjat li jwassal elettriku rinnovabbli bi prezz fiss direttament fid-djar u n-negozji, u tafferma l-irwol ta’ GO fit-tranżizzjoni ta’ Malta għal futur aktar ekoloġiku.
