Il-Qorti tal-Appell irrevokat sentenza ta’ tliet xhur ħabs sospiżi għal sena mogħtija f’Awwissu ta-sena li għaddiet lill-Patri Dumnikan Fr Charles Fenech ta’ 58 sena li kien nstab ħati li abbuża sesswlament minn mara li ngħad li kienet tbati b’mard mentali.
Il-Qorti tal-Appell Kriminali ppresduta mill-Imħallef Consuelo Scerri Herrera laqgħet l-appell tal-Patri Dumnikan li sostna li l-prosekuzzjoni ma ġabitx il-provi mitluba mil-liġi li kienu juru li wettaq attentat vjolenti fuq il-pudur tal-mara. Il-Patri kien magħruf bħala d-Direttur tal-Kerygma u Radju Marija.F’sentenza ta’ 61 paġna, il-qorti tal-appell qalet mhix konvinta li Fr Charles kellu x’jaqsam sesswalment mal-mara bil-għan li jisfruttuha minħabba marda fil-moħħ tagħha. Qalet li mhux kontestat li Fr Charles u l-mara kellhom relazzjoni pjuttost intima bejniethom fejn kienu jiltaqgħu sikwit f’bosta postijiet biex jagħmlu atti sesswali fosthom fil-kunvent jew fid-dar tal-mara.
Madankollu qalet li m’hemmx dubbju li meta riedet, il-mara kienet twaqqaf il-laqgħat li kien ikollha mal-Patri. Qalet li r-relazzjonijiet sesswali li Fr Charles kien ikollu mal-mara kienu jsiru bil-kunsens ta’ xulxin.
Il-qorti rrimarkat li żgur li f’dan il-każ ma jirriżultax li Fr Charles kien jaf li l-mara ma kinitx qed tagħti l-kunsens tagħha sabiex isiru l-atti sesswali meta tqies li kienet hi stess li kienet tmur għalih bil-karozza tagħha u li jsuqu għal diversi postijiet fejn jispiċċaw jinnamraw.
“Li kieku kienet daqstant vulnerabbli ma kinitx tkun hi li tieħu l-azzjoni, iżda kienet tkun fuq id-difiża u mhux l-attriċi tas-sitwazzjoni,” qalet il-Qorti waqt li rreferiet ukoll għall-kliem kollu mħabba f’kartolina li bagħtitlu f’Jum San Valentinu.
Il-Qorti nnotat ukoll li meta sħabha marru jirrapportaw il-każ il-Kurja, hija ċaħdet l-akkużi fil-konfront ta’ Fr Charles għax ma riditx li jkollu inkwiet minħabba fiha. Il-Qorti qalet li għalkemm kienet persuna vulnerabbli, il-mara kienet taf eżattament x’inhi tagħmel.
Fid-deċiżjoni tagħha, il-Qorti kkundannat lil Fr Charles Fenech ġimgħa ħabs sospiża għal sitt xhur flimkien ma’ multa ta’ €500 wara li sabitu ħati li kellu x’jaqsam mal-mara f’post pubbliku.
