Il-firda fil-Partit Nazzjonalista, li Bernard Grech jipprova jgħid li m’hemmx, għadha b’mod ċar.
Din id-darba ħarġet minn fomm il-kandidat Nazzjonalista Joe Giglio.
Dan meta kien fuq ir-radju tal-Knisja, is-Sibt filgħodu, hekk kif il-preżentatur Andrew Azzopardi staqsih għaliex il-Partit Nazzjonalista jinsab fl-agħar żmien tiegħu.
U hawnhekk Joe Giglio kien skjett għall-aħħar u semma l-pubblikazzjoni ta’ stħarriġ wara l-ieħor, li fihom Bernard Grech naqqas fil-fiduċja.
F’din l-intervista, l-Avukat Giglio ħareġ l-għadab tiegħu hekk kif minn żmien għal żmien ikun hemm attakki fil-konfront tiegħu.
Dan hekk kif Joe Giglio huwa ta’ xkiel għall-establishment Nazzjonalista, hekk kif ħiereġ fuq żewġ distretti l-aktar Nazzjonalisti u l-aktar għal qalb l-establishment Nazzjonalista.
Fost dawn hemm id-disa’ distrett, li fuqu ħiereġ id-Deputat Nazzjonalista Jason Azzopardi.
F’dan id-distrett hemm ġlied u pika kbira bejn il-kandidati u t-taqtiegħa bejn l-avukati Jason Azzopardi u Joe Giglio ġabet iżjed firda fid-distrett.
L-attakki fuq l-Avukat Giglio jkunu mgħejjuna minn ta’ Repubblika u Manuel Delia.
B’dan tal-aħħar sejjaħ il-kandidatura ta’ Joe Giglio bħala dnub.
Barra lil Jason Azzopardi, l-avukat Giglio jaffettwa wkoll lil Karol Aquilina.
Intant fid-dibattitu fuq l-istazzjon tar-radju tal-Knisja, kien hemm il-Membru Parlamentari Laburista, Jonathan Attard, li nnota l-kuntrast bejn il-Gvern u l-Oppożizzjoni.
Qal, “Il-messaġġ li jwassal il-Partit fil-Gvern huwa dan, m’aħniex perfetti altru minn hekk. Però jifhmu li aħna nieħdu d-deċizzjonijiet u nsibu s-soluzzjonijiet u anke jekk tara issues li n-nies iħasbuhom, fl-aħħar mill-aħħar isemmu issues partikolari, l-ambjent u diversi oħrajn. Però imbagħad fl-aħħar mill-aħħar jemmnu li l-Partit Laburista fil-Gvern jista’ jsolvihom dawn is-sitwazzjonijiet.”
