• L-ATTAKK FUQ CARDONA PARTI MINN PJAN LI ŻVELAJNA AĦNA
• CARDONA: “GĦANDI L-PROVI LI JKISSRU DAK LI QALET DCG”
L-attakk fuq il-Ministru Chris Cardona, li kkarga iktar kmieni din il-ġimgħa, huwa parti minn strateġija miftiehma sena ilu fid-Dar Ċentrali. Strateġija li d-dettalji tagħha konna żvelajniehom aħna b’mod esklussiv f’Marzu li għadda u li ma kull xahar li għadda dejjem ġew ikkonfermati.
F’laqgħa, fid-29 ta’ Frar 2016, fid-Dar Ċentrali kienet maqbula strateġija ħarxa li kellha tieħu iktar ħajja iktar ma toqrob il-Presidenza tal-Kunsill tal-Unjoni Ewropea kif fil-fatt qed jiġri. Dakinhar kien intqal li bl-ekonomija tal-pajjiż miexja b’ritmu li ma jrid jaqta’ xejn, ma kienx hemm għażla oħra għajr protesti u manuvri bil-għan li wieħed jipprova jistaġna xi ftit l-affarijiet. L-istrateġisti tal-PN miġbura madwar mejda fil-preżenza tal-Kap tal-Oppożizzjoni qalu li jekk ma jsirx hekk ikun diffiċli li wieħed jirbaħ l-elezzjoni ġenerali.
Ftit tal-ġimgħat wara kienu bdew il-protesti fit-toroq iżda dawn ftit li xejn ħallew effett għax pajjiżna baqa’ miexi ’l quddiem.
Però kien hemm lat ieħor li kien maqbul dakinhar. L-attakki personali.
Il-qlajjiet fuq Chris Cardona huma proprju parti minn din l-istrateġija meta fid-Dar Ċentrali kienu qablu li jsejħu eks pulizija u nies attivisti ta’ ċertu sfond, inkluż tal-ġakketta blu, biex isegwu esponenti tal-Gvern u l-familji tagħhom biex jinħolqu stejjer personali.
Fejn ma jsibux kienu lesti jivvintaw. Fejn hemm dubju kienu lesti li jagħmluh fatt.
Prova ta’ dan kien il-Viċi Kap tal-Partit Nazzjonalista, Beppe Fenech Adami, iktar kmieni din il-ġimgħa li għalkemm mingħajr provi f’idejh kien lest jirrepeti dak li qalet Daphne Caruana Galizia.
F’dik il-laqgħa kien miftiehem ukoll li jrid isir minn kollox biex titħarbat il-Presidenza Maltija tal-Kunsill tal-Unjoni Ewropea u l-ewwel sforz li sar kien wieħed politiku.
Ipprovaw iqajmu kemm jistgħu l-kwistjoni Panama fil-Parlament Ewropew. Iżda mingħajr suċċess. Filwaqt li iktar qabel ipprovaw inisslu dubji fuq l-impjant tal-enerġija għax hu wieħed mill-ikbar proġetti tal-Gvern. Iżda hawn ukoll mingħajr suċċess (ara paġna 9).
Kien dan li wassal biex tkun addottata l-parti tal-istrateġija fejn l-attakk jinbidel f’wieħed personali. Fl-aħħar ġimgħat dawn l-attakki kienu kontinwi u nfetħu sensiela ta’ libelli kontra esponenti tal-PN.
Saru kampanji fuq uffiċjali tal-Gvern, bħal dik fuq Neville Gafa, fejn imbagħad irriżulta li t-theddid li s-sors tal-istorja ma kien xejn għajr messaġġ mibgħut mis-sors lis-sors innifsu.
B’Malta titlaq tajjeb immens fil-Presidenza tal-Unjoni Ewropea, l-istrateġisti tal-PN qablu li jridu jżidu d-doża u din id-darba fil-mira kien hemm id-Deputat Mexxej tal-Partit Laburista. Cardona kien magħżul għax mhux l-ewwel darba li spiċċa fil-mira ta’ Caruana Galizia li bħal dejjem kienet hi li bdiet l-attakk, bil-midja tal-PN imbagħad tagħmel l-istorja tagħha. Fid-Dar Ċentrali qalu li la lil Cardona ġieli ppruvaw iħammġuh qabel, seta’ jkun iktar faċli li jimmiraw fuqu.
Skont il-pjan, li saħansitra kien qed ikun żvelat qabel jiġri fuq glennbedingfield.com, il-midja tal-PN telgħet Dusseldorf tħallas biex tikkonvinċi qħab – persuni li jbigħu ġisimhom għall-flus – biex jgħidu li raw lill-Ministru Chris Cardona u l-konsulent tiegħu li kien miegħu l-Ġermanja fuq xogħol.
L-istrateġija hija ċara. L-istorja għandha tittawwal kemm tista’ bil-għan li n-nies jitkellmu mill-inqas fuq is-suċċessi li nkisbu mill-Presidenza. Fosthom id-deal dwar ir-roaming u l-ftehim dwar l-immigrazzjoni fis-summit. U min l-istrateġija ma togħġbux għax meqjus moderat, bħal Viċi Kap Mario De Marco, għandu jistenna l-attakki.
Fuq kollox, minkejja l-libelli u ċ-ċaħdiet ta’ Cardona kollox baqa’ miexi skont il-pjan. Iżda, Cardona ma ddejjaqx jiffaċċja l-midja u mar fil-programm Xtra fejn saħansitra ddibatta ma’ Beppe Fenech Adami. Qal li għandu provi f’idejh li se jkissru dak li allegat Daphne Caruana Galizia. Tenna li għalkemm il-loġika tgħid li huwa min jallega li jrid jipprova l-ħażin hu kien se jagħmel bil-kontra u jipprova li dak li ntqal dwaru mhu xejn għajr gidba.
