Għaxar persuni minn ħdax-il akkużat li s-Sibt filgħaxija tressqu l-Qorti mixlija bi frodi u ħasil ta’ flus fost oħrajn inżammu arrestati.
L-akkużati kollha li tressqu l-Qorti huma Keith Schembri, eks Chief of Staff fl-Uffiċċju tal-Prim Ministru, missieru Alfio Schembri, Malcom Scerri, Robert Zammit, Brian Tonna, Karl Cini u Manuel Castagna minn Nexia BT, Marie Katrin Bondin Carter u Matthew Pace minn Zenith Finance, Lorraine Falzon u Vince Buhagiar, eks Direttur Maniġerjali ta’ Allied Newspapers li għandha f’idejha l-pubblikazzjoni tat-Times.
Dawn il-persuni tressqu quddiem il-Maġistrat Charmaine Galea wara l-għeluq ta’ żewġ Inkjesti Maġisterjali u investigazzjonijiet intensivi mill-Iskwadra ta’ Kontra l-Ħasil tal-Flus fi ħdan id-Dipartiment tal-Investigazzjonijiet tar-Reati Finanzjarji tal-Pulizija.
L-akkużi huma fost oħrajn dwar allegazzjonijiet fuq l-operat tal-Allied Newspapers.
Qed ikun allegat li tlettax-il sena ilu seħħ tixħim bejn it-tmexxija tal-kumpanija u negozji oħra, partikolarment bejn Adrian Hillman, li kien imexxi l-Allied u Keith Schembri.
Rapporti qed jgħidu li Hillman se jkun estradit mir-Renju Unit biex jaffaċċja akkużi quddiem il-Qorti Maltija.
L-ewwel li daħlu fl-awla kienu Brian Tonna, Karl Cini, Manuel Castagna u Marie Katrin Bondin Carter.
Fost l-akkużi li kienu mixlija bihom l-ewwel erba’ akkużati hemm frodi, ħasil ta’ flus, xhieda falza, falsifikazzjoni u li għamlu dikjarazzjoni falza.
Dawn l-erba’ akkużati ċaħdu l-akkużi iżda t-talba għall-ħelsien mill-arrest ġiet miċħuda minkejja li d-Difiża fakkret li l-akkużati kkollaboraw mal-pulizija iżda l-Prosekuzzjoni aċċennat fuq il-gravità tal-każijiet u qalet li l-ammont rikavat jiżboq in-nofs miljun ewro.
Dehret ukoll Beverly Tonna għan-nom ta’ waħda mill-għoxrin kumpanija li qed jaffaċċjaw akkużi.
Hija ċaħdet l-akkużi.
Wara kien imiss lil Keith Schembri, Alfio Schembri, Malcolm Scerri u Robert Zammit jidhru quddiem il-Maġistrat.
Fost l-akkużi fil-konfront ta’ dawn l-aħħar erba’ imputati hemm dawk ta’ ħasil ta’ flus, assoċjazzjoni għal fini tat-twettiq ta’ reat u frodi.
Keith Schembri ġie akkużat bir-reat ta’ xhieda falza, korruzzjoni u falsifikazzjoni.
Malcolm Scerri ġie akkużat bir-reat ta’ korruzzjoni.
Dawn l-aħħar erba’ akkużati wieġbu mhux ħatja.
Id-Difiża rrimarkat li fl-akkużi hemm imniżżel perjodu ta’ tnax-il sena li fihom allegatament sar ir-reat.
Għalhekk l-Avukat Difensur staqsa meta allegatament seħħ u meta ġew mixtrija l-magni tal-istampar tat-Times of Malta.
L-Ispettur ikkonfermat li inkjesta li saret ma sabitx li kien hemm kickbacks.
Il-Prosekuzzjoni oġġezzjonat għall-ħelsien mill-arrest hekk kif qalet li fejn jidħlu akkużi ta’ ħasil ta’ flus hemm ammonti kbar involuti.
Bħalma għamlet qabel, il-Maġistrat Charmaine Galea ssospendiet is-seduta għal ftit ħin u wara daħlet fl-awla u ċaħdet it-talba għall-ħelsien mill-arrest.
Fl-awla mbagħad kien imiss jidhru Matthew Pace u Lorraine Falzon.
Dawn wieġbu mhux ħatja għall-akkużi miġjuba kontrihom iżda nżammu arrestati.
Hekk kif il-Qorti tat id-deċiżjoni tagħha, Falzon dehret tintelaq fuq Pace u nfaqgħet tibki.
Fl-aħħar fl-awla daħal Vince Buhagiar biex jaffaċċja akkużi kriminali.
Il-Prosekuzzjoni spjegat li Vincent Buhagiar huwa akkużat b’reati msemmija fit-tieni inkjesta u li l-allegat reati seħħew fl-2012.
Il-Prosekuzzjoni oġġezzjonat għall-ħelsien mill-arrest wara li l-akkużi huma dwar rakkomandazzjoni waħda mill-inkjesta u qalet li l-allegat reati huma dwar eluf ta’ ewro wara li Buhagiar allegatament tradixxa r-responsabilitajiet li kien fdat bihom.
Wara li semgħet il-partijiet kollha, il-Maġistrat Charmaine Galea laqgħet it-talba għall-ħelsien mill-arrest fuq kundizzjoni li kuljum jiffirma fl-għassa.
Buhagiar irid jidepożita €20,000 u jagħti garanzija personali ta’ €40,000.
Fil-każ tal-akkużati ġew friżati l-assi.
Aqra wkoll:
https://www.one.com.mt/2021/03/20/kontinwament-aggornat-keith-schembri-u-akkuzati-ohrajn-jinzammu-arrestati/
