F’Għawdex mistennija numru kbir ta’ nies għaċ-ċelebrazzjonijiet li l-Ministeru għal Għawdex qed jorganizza bħala parti mill-programm ambizzjuz ‘Il-Milied f’Għawdex’.
L-attivitajiet tal-lejla huma mistennija jkunu akbar mis-snin ta’ qabel u ser ikunu mqassma fi Pjazza San Ġorġ. Il-qofol tal-ispettaklu se jsir fi Pjazza Indipendenza ir-Rabat Għawdex.
Il-ftuħ ser isir mill-band DCapitals. Wara ikompli bi spettaklu esklussiv mill-kantanta Għawdxija rebbieħa ta’ XFactor u rappreżentanta ta’ pajjiżna fil-Eurovision 2019, Michela Pace.
Michela se tkun akkumpanjata minn numru ta’ kantanti oħra li se jwasslu divertiment mill-aqwa ta’ mużika għal gosti ta’ kulħadd.
Mistennija ferm hija l-kantanta Ingliża Becky Hill li ser tagħti kunċert ta’ siegħa sħiħa ta’ mużika popolari li ħafna minnhom jinsabu fl-aqwa klassifiċi bħalissa. Fost l-oħrajn bil-kollaborazzjoni ma’ Sigala tas-suċċess internazzjonali ‘Wish you well’.
Kif inhu xieraq, fuq il-palk prinċipali ser tingħata Merħba spettakolari għas-sena l-ġdida permezz ta’ countdown mill-isbaħ b’mużika u viżwali kreattivi.
L-attività ser tibda fis-9:30 ta’ filgħaxija u tibqa’ għaddejja matul il-lejl sa kmieni filgħodu, b’after party mid-DJ popolari JJoy.
Dan l-ispettaklu ser jiġi preżentat minn Clint Bajada u huwa organizzat mill-Ministeru għal Għawdex. Din l-attività hija bla ħlas.
