“Għawdex fis-snin li ġejjin se jesperjenza twelid ġdid. Gvern Laburista se jkun qed jassigura li tkomplu tgawdu mill-ġid tagħkom, Għawdex se jsir l-għira ta’ kull pajjiż.”
Dan qalu l-Prim Ministru Joseph Muscat fid-diskors tiegħu quddiem folla kbira ta’ nies taħt it-tinda fir-Rabat, Għawdex.
Il-Prim Ministru u Mexxej Laburista għamel referenza għall-proposti tal-Partit Laburista li jinkludu:
- Żieda fin-numru ta’ btajjel pubbliċi f’Malta
- Depożitu ta’ 10% għal min jixtri l-ewwel dar u estensjoni tal-iskema tal-first time buyers għal dawk li jkunu waslu biex jixtru t-tieni dar
- Tnaqqis fit-taxxi u aktar flus fil-bwiet tan-nies
- Żieda fil-pensjoni minima
- L-ikbar investiment fl-istorja fit-toroq Maltin u Għawdxin
Joseph Muscat qal lill-Għawdxin li jafu li dawn il-proposti jistgħu jsiru għax Gvern Laburista f’dawn l-erbà snin kien bilgħaqal u għalhekk jista’ jmur quddiem il-poplu bid-dettalji dwar il-wegħdi ewlenin u mhux 100 jum wara bħal Simon Busuttil.
“Aħna ngħidulkom illum x’se nagħmlu sal-inqas dettall. Ġibna tkabbir ekonomiku u nfaqna biss 30% tal-fondi u ħallejna 70% tagħhom fil-kaxxa ta’ Malta. B’dawn il-flus se nkunu qed nassiguraw li l-ġid jasal għand kulħadd” qal il-Mexxej Laburista.
Il-Prim Ministru qal li dawn il-proposti Gvern Laburista jrid li jsiru biex jinħoloq aktar xogħol, għan ewlieni ta’ dan il-moviment.
“Qegħdin naħdmu aktar minn Gvernijiet oħra, l-istatistika turi li dak li għamilna aħna f’erbà snin, huwa daqs kemm ħolqu xogħol tliet gvernijiet f’daqqa. 21 impjieg ġdid kuljum.”
Hawnhekk, il-Mexxej Laburista għamel referenza għall-500 impjieg ġdid li tħabbru din il-ġimgħa u li llum min iħaddem qed isib problema biex isib biżejjed impjegati, “iżda aħna ngħidulhom li din il-problema se tkompli tikber għax se nkunu qed inkomplu nżiedu l-postijiet tax-xogħol.”
Id-differenza bejn Joseph Muscat u Simon Busuttil
Joseph Muscat spjega d-differenza bejn il-Partit Laburista u l-Partit Nazzjonalista u qal lill-Għawdxin li qed jissugraw, “Oqogħdu attenti għax l-Għawdxin qed jissugraw, qegħdin f’salib it-toroq dwar x’futur se tagħżlu għal din il-gżira, Ħaddieħor irid iħajjar lin-nies biex jiġu Għawdex b’mod artifiċijali, l-idea tagħna hija totalment bil-maqlub – Aħna rridu li n-nies iħalsu huma biex jiġu Għawdex għax irridu li din il-gżira tkun kalamita ta’ investiment.” Il-Mexxej Laburista qal li l-ġid u x-xogħol iwassal għal attrazzjoni naturali lejn Għawdex.
Muscat qal li Simon Busuttil min-naħa l-oħra jrid li jkeċċi lil tal-isptar, ikeċċi lil ta’ Barts u jeqred investiment li se jkun qed iwassal biex l-Għawdxin igawdu minn sptar aqwa minn ta’ Malta. Hawnhekk, kellu appell għall-ħaddiema tal-isptar, li dawn m’għandhom iħallu lil Simon Busuttil iqarraq bihom għax il-ħaddiema tal-Gvern “se jibqgħu ħaddiema tal-Gvern.”
Joseph Muscat spjega xi jfisser dan l-investiment għal Għawdex; “Jiġu studenti joqogħdu Għawdex u jitilqu fis-Sajf meta jkollkom nies bħala turisti, jiġu familji tagħhom, pazjenti minn Malta u barranin. Aktar kirjiet, aktar nies jaħdmu u jgħixu hawn u li jonfqu l-flus tagħhom f’Għawdex.”
Il-Prim Ministru qal li ma tistax tgħid li se ġġib in-nies f’Għawdex meta se tneħħi l-investiment. B’referenza għall-Partit Nazzjonalista tenna li “Jekk kemm il-darba jkeċċu dan l-investiment minn Għawdex, ir-residenti jispiċċaw bi sptar mhux sostennibbli, ħaddiema jiġu trasferiti Malta u min jaħdem f’Għawdex jerġa’ jispiċċa jaħdem Malta.”
Aktar proposti għal Għawdex
Fil-jiem li ġejjin il-Partit Laburista se jkun qed iħabbar il-proposti dwar Għawdex, bl-għan ewlieni li Gvern Laburista jkompli jkattar il-ġid f’din il-gżira. Hawnhekk, il-Prim Ministru spjega l-kredibilitá ta’ dan il-Gvern b’referenza għall-fast ferry u l-mina bejn Malta u Għawdex.
“Gvern ġdid fi ftit tax-xhur tal-oħra se nkunu qegħdin nintroduċu servizz biex l-Għawdxin ikunu jistgħu jaqsmu mill-Imġarr Għawdex sal-Belt Valletta mingħajr dewmien. Filwaqt li se niedu l-prepazzjonijiet tagħna biex nibdew ix-xogħlijiet tal-mina bejn Malta u Għawdex.”
Il-Mexxej Laburista temm l-indirizz tiegħu b’appell għall-Għawdxin li quddiemhom għandhom għażla: Joseph Muscat jew Simon Busuttil u l-koalizzjoni ta’ konfużjoni.
L-appell tal-Mexxej Laburista
“Fit-3 ta’ Ġunju għandkom għażla; ma nistgħux naħsbu li r-riżultat jiġi bl-entużjażmu biss u għalhekk irridu nħeġġu aktar nies biex joħorġu jivvottaw. Intom l-Għawdxin għandkom kandidati ta’ kwalità li tistgħu tagħżlu minn fosthom u wara li tagħmlu l-ewwel għażla tagħkom, ivvottaw għall-kandidati kollha tal-Partit Laburista għax l-aqwa żmien ta’ pajjiżna għadu ġej.”
