Permezz tat-taħriġ li qed jingħata mill-K9 Search & Rescue Malta, aktar klieb f’pajjiżna qed jitgħallmu jfittxu persuni mitlufa jew saħansitra nies mirduma.
Is-Sibt filgħodu ONE News żar il-post fejn jitħarrġu dawn il-klieb sabiex jistħarreġ il-metodi tant importanti li jiddeterminaw ħajja jew mewt ta’ persuna involut f’sitwazzjoni ta’ emerġenza.
Tkellimna mal-president tal-għaqda K9 Search & Rescue, Joe Attard.
Ma’ One News spjega x’jinvolvi x-xogħol ta’ din l-għaqda. Barra minn hekk spjega ukoll li jsiru ħames eżamijiet differenti sabiex jiġi determinat il-kelb huwiex preparat għal dawn is-sitwazzjonijiet.
Huwa spjegalna wħud minn dawn l-eżamijiet.
“Il-play drive, waddabnielu ballun it-toy tiegħu, normalment nużaw biċċa ħabel, mar iġibu, insejħulha two-way award isimha magħha. It-test l-ieħor li huwa l-prey drive, il-prey drive ifisser prey, qed jagħmel it-tug of war miegħi. Irid jieħu t-toy hu u nżommulu. Għal l-ewwel nibdew bilmod.”
One News tkellem ukoll mal-membri tal-K9 Search & Rescue Malta.
Gordon Delia, qalilna li ilu jinvolvi ruħu mal-għaqda sa mit-twaqqif tagħha. Huwa pprovda wkoll informazzjoni għal dawk kollha li huma interessati sabiex jissieħbu mal-għaqda bix-xewqa li l-kelb jew klieb tagħhom jingħataw taħriġ.
“Min jixtieq jingħaqad magħna, just għandna l-page tagħna K9 Search & Rescue Malta u jikkuntatjana hemmhekk. Għandna min jieħu ħsieb jevalwa l-kummenti u l-ħtiġijiet tal-persuna li trid tingħaqad magħna.”
Preżenti għat-taħriġ ta’ dawn il-klieb, kien hemm ukoll is-Sindku ta’ San Ġwann, Trevor Fenech. Hu qal li fil-passat l-art ta’ Swejt kienet għalqa mitluqa u abbandunata.
Ma’ One News qal li dan l-ispazju llum huwa miftuħ għal pubbliku.
“Anke min hu interessat, jista’ jiġi hawnhekk bla ebda ħlas jgħallem il-klieb tagħhom, jagħmlu t-training. U fil-futur qrib ser ikun hemm ukoll upgrade ta’ dan il-post fejn ħa jsir area fejn il-familja kollha tista’ tiġi hawnhekk u tutilizza din l-area fejn qegħdin hawnhekk ġewwa tas-Swejt f’San Ġwann.”
