Il-Baħri… dak li minħabba l-ħidma tiegħu tul il-pandemija kellna moħħna mistrieħ li l-provvisti ta’ prodotti essenzjali u mediċini mhux se jonqsu. Madankollu, din il-pandemija ġabet tbatija kbira fuq dawn il-ħaddiema li spiċċaw baqgħu għal xhur sħaħ maqbuda fuq il-vapur.
Ir-rappreżentant f’Malta għall-federazzjoni għall-ħaddiema tat-trasport, Paul Falzon spjega kif il-pandemija rat numri kbar ta’ ħaddiema li spiċċaw maqbudin fuq il-vapur li jaħdmu fuqu.
Is-Sur Falzon qalilna, “Il-baħrin laqtugħha u laqtugħha sewwa. Il-baħrin laqtugħha għaliex kif jaf kulħadd l-ajruporti għalqu, ħafna mil-linji waqfu t-titjiriet. Mela la kellek titjiriet inti, la kellek ‘airports’ u xejn. Issa dawn inqabdu fil-vapur, spiċċalhom il-kuntratt, dawn ġieli jkunu erba’ xhur, sitt xhur, disa’ xhur kuntratt u peressli nqabdu hemm, illum għandna baħrin aħna illi ilhom tmintax, għoxrin, anke tnejn u għoxrin xahar maqbudin fuq il-vapur.”
Minn Marzu l’hawn dawn il-ħaddiema jispiċċaw jgħaddu żmien twil fuq il-baħar jgħixu f’kundizzjonijiet miżeri fejn lanqas setgħu jinżlu l-art bejn vjaġġ u ieħor.
Falzon stqarr, “Każi ta’ suwiċidji kellna, każi ta’ ‘breakdowns’ kellna, dik li tissejjaħ ‘fatigue’, ‘fatigue’ mentali, għajja mentali, għajja fiżika, anke l-fatt li jafu li ma jistgħux jinżlu u n-numru huwa kbir. In-numru jvarja bejn tliet mija u erba’ mitt elf madwar id-dinja kollha qed nitkellmu.”
Stqarr li f’dan iż-żmien b’mod speċjali, il-baħri huwa ħaddiem essenzjali li bis-saħħa tiegħu f’dan iż-żmien tal-pandemija ġab ċertu serħan il-moħħ li l-pajjiż ser jibqa’ jkollu provvista tal-prodotti essenzjali.
Falzon qal, “Inti għandek disgħin fil-mija tal-kummerċ dinji jiġi trasportat bil-baħar. Disgħin fil-mija. Huwa importanti. Dak li konna ngħidulu essenzjali, l-ikel, mediċini, iż-żejt, il-gass, il-fjuwil, jiġifieri d-diesel u l-petrol. Dawn kollha qed jinġarru mill-bastimenti, bil-baħrin fuqhom.”
