Fi żjara fl-uffiċini l-ġodda tal-CommCare, is-Segretarju Parlamentari għad-Drittijiet ta’ Persuni b’Diżabilità u Anzjanità Attiva Justyne Caruana ħabbret rebranding ta’ dan is-servizz. ‘‘Is-servizz tal-CommCare ilu jeżisti iżda minkejja li huwa l-ikbar servizz li jingħata fil-komunità kemm f’Malta kif ukoll f’Għawdex, qatt ma ġie rikonoxxut daqskemm jistħoqqlu’’, qalet Dr Caruana.
Is-servizz tal-CommCare jingħata lil dawk kollha fil-komunità li jkollhom bżonn l-għajnuna professjonali fid-djar tagħhom f’Malta u f’Għawdex. Dan is-servizz jingħata minn team ta’ professjonisti bħal tobba speċjalizzati fil-ġerjatrija, nurses, care workers, physiotherapists, occupational therapists, speech therapists, social workers, podiatrists u allied health professionals fost l-oħrajn.
‘‘Dawn huma kollha involuti fl-għoti ta’ diversi servizzi skont il-bżonn meta persuna ma tistax toħroġ mid-dar biex tuża s-servizzi tas-saħħa fil-komunità. Dan is-servizz ma jingħatax biss lill-anzjani u lill-persuni b’diżabilità, iżda lil kull min ikollu bżonn’’, qalet is-Segretarju Parlamentari. Matul l-2016 ingħataw ukoll servizzi relatati mal-IVF, injezzjonijiet tal-influwenza, servizzi relatati mad-dijabete u oħrajn.
Il-Gvern jemmen fis-servizzi tal-komunità u għalhekk qed jinvesti sostanzjalment fit-tisħiħ tal-CommCare. Fil-fatt, hemm kuntratt fis-seħħ mal-privat biex il-CommCare tlaħħaq mad-domanda tas-servizzi. Dr Justyne Caruana ħabbret li minkejja li s-sena li għaddiet il-CommCare għamlet aktar minn 760,000 intervent, m’hemm l-ebda lista ta’ stennija għal dan is-servizz, u s-servizzi jingħataw kważi b’mod immedjat.
Fl-istess waqt saħħaħna din is-sezzjoni permezz ta’ reklutaġġ ta’ professjonisti fosthom tliet speċjalisti fil-ġerjatrija, u issa wkoll b’uffiċini ġodda minn fejn ikun jista’ jitħaddem dan is-servizz. Is-servizz tal-CommCare għalhekk, mhux biss se jkollu logo ġdid u uniformijiet ġodda għall-ħaddiema, imma wkoll post ġdid, modern u spazjuż minn fejn ikunu jistgħu jippjanaw u jwettqu xogħolhom il-ħaddiema.
Minkejja li s-servizz diġà huwa kbir, issa se jkun possibbli li jikber peress li se jiġu konsolidati proċeduri relatati mas-servizzi mogħtija mid-Dipartiment tal-Anzjanità Attiva u Kura fil-Komunità. ‘‘Is-servizzi se jsiru aktar aċċessibbli billi se jkun hemm applikazzjoni waħda u l-evalwazzjoni ta’ kull talba u kull każ se ssir permezz ta’ proċedura waħda mill-CommCare. Dan ifisser servizzi aktar aċċessibbli, inqas dewmien, inqas burokrazija u għalhekk servizzi ta’ kwalità iżda wkoll fil-pront’’, qalet Dr Justyne Caruana.
Is-Segretarju Parlamentari rringrazzjat lill-ħaddiema kollha tal-CommCare li fis-skiet imma b’effiċjenza, dejjem għaddejjin b’xogħolhom billi jagħtu servizz lil eluf ta’ Maltin u Għawdxin fi djarhom kuljum, bi professjonalità kbira u b’dedikazzjoni impekkabbli.
