Waqt seduta Parlamentari l-Erbgħa filgħaxija, għaddiet ir-riforma fil-Liġi tal-Inkjesti Maġisterjali, bil-voti favur biss min-naħa tal-Gvern, waqt li, kif kien mistenni, l-Oppożizzjoni Nazzjonalista vvotat kontra, inkluż biex jinqatgħu l-abbużi minn sistema ġudizzjarja importanti.
Dan seħħ wara li, it-Tlieta waranofsinhar, il-Kumitat Permanenti għall-Konsiderazzjoni ta’ Abbozzi ta’ Liġi approva l-abbozz ta’ liġi li se jkun qed jirriforma l-proċedura.
Hawn ukoll dan il-kumitat kien ikkaratterizzat minn manuvri tal-Oppożizzjoni, rappreżentata mid-Deputat Karol Aquilina. Manuvri biss intiżi biss biex itawlu inutilment il-proċess leġiżlattiv, b’diskorsi partiġjana u estremi fil-preżenza tal-għaqda Repubblika, li wkoll intervjeniet f’dan l-istadju Parlamentari.
Madankollu, il-Gvern mhux biss ressaq u spjega kull klawżola tal-abbozz, bil-Ministru għall-Ġustizzja, Jonathan Attard, iġib fix-xejn id-diżinformazzjoni u l-asserzjonijiet bla bażi ta’ Aquilina, li kien akkumpanjat f’dan il-kumitat mid-Deputati mill-fazzjoni estremista tal-Partit Nazzjonalista, Beppe Fenech Adami u Mark Anthony Sammut.
Fil-kumitat, il-Ministru Attard qal li d-dritt ta’ ċittadin li jitlob lill-Qorti il-ftuħ ta’ inkjesta kien jitneħħa kieku l-Gvern mexa mar-rakkomandazzjonijiet tal-Kummissjoni Venezja u mal-Kummissjoni Bonello, li t-tnejn irrakkomandaw li l-inkjesti kollha kellhom jitneħħew minn idejn il-Maġistrat u jiġu trasferiti lill-Avukat Ġenerali.
Għall-kuntrarju, dan il-Gvern b’responsabilità ħalla l-inkjesti f’idejn il-Maġistrati, billi ħoloq rwol ta’ Maġistrat speċjalizzat, bid-dritt ta’ ċittadin li jitlob il-ftuħ ta’ inkjesta elevat quddiem il-Qorti Kriminali ppreseduta minn Imħallef wara li jkun tressaq rapport quddiem il-Pulizija u ngħatalhom żmien biex jinvestigaw.
Il-Ministru għall-Ġustizzja li, sa mill-bidu, tenna li, bħal dejjem, il-Gvern se juża l-proċess Parlamentari biex ikompli jtejjeb il-liġi proposta, ressaq numru ta’ emendi li komplew isaħħu l-integrità tal-inkjesti u d-drittijiet proċedurali.
Intqal li dan hu abbozz li se jagħti drittijiet ġodda lill-vittmi u l-qraba tagħhom fil-proċess tal-inkjesti, drittijiet proċedurali ġodda lil persuni suspettati, idaħħal kontabilità finanzjarja u fil-kredenzjali tal-esperti tal-Qorti, jipprovdi termini ċari u jevita li jkun hemm min, b’mod irresponsabbli, jabbuża mis-sistemi ġudizzjarji ta’ pajjiżna biex ikisser lin-nies inġustament.
