Hekk kif wasalna fl-aħħar ġimgħa tal-kampanja elettorali, il-Partit Laburista għandu skedati aktar attivitajiet kbar tal-massa fil-jiem li ġejjin. L-ewwel minn dawn ippreparati se jkun mass rally nhar il-Ħadd li ġej fl-10:30 ta’ filgħodu fiż-Żejtun.
Minbarra hekk, il-kunċert ‘Together in Concert’, li sentejn ilu nieżel tajjeb ħafna man-nies, issa se jkun qed jirritorna l-Ħamis li ġej, 6 ta’ Ġunju, biex itemm bil-kbir il-kampanja ‘Is-Saħħa lill-Maltin’.
Għal dan l-avveniment, għadd ta’ kumitati lokali tal-Partit Laburista qed jorganizzaw it-trasport, inkluż mill-gżira Għawdxija bix-xarabanks li jitilqu miċ-Ċirkewwa.
Biex ikollna aktar stampa ċara ta’ wieħed x’għandu jistenna minn dan l-avveniment, ONE News tkellem Clint Bajada, li qasam tagħrif dwar x’se jkun qed jinvolvi dan il-kunċert.
“Se tkun orkestra mmexxija minn Maestro Kevin Abela, mużiċisti li kulħadd jafhom, kanzunetti ġodda għal din l-edizzjoni. Għalhekk se nipprovaw noħolqu kunċett ġdid b’mużika, li se tolqot il-widna ta’ kulħadd. Minn hemm ovvjament il-qofol se jkun id-diskors tal-Prim Ministru Robert Abela. Irridu nfakkru lil dawk li qed isegwuna biex jingħaqdu magħna fl-aħħar jum tal-kampanja. Aħna lin-nies ngħidulhom ikunu magħna bħala protagonisti mhux sempliċiment isegwu.”
Hu tenna jappella biex in-nies jingħaqdu fl-MFCC nhar il-Ħamis li ġej biex ilkoll flimkien intemmu l-kampanja ‘Is-Saħħa lill-Maltin’.
“Din se tkun attività mimlija mużika u divertiment. Jiġifieri aħna qed insejħu lil kull min b’xi mod jew ieħor kien magħna f’din il-kampanja. Kif nafu kellna mijiet ta’ nies li ngħaqdu magħna f’kull lokalità, fejn dawn għandhom jingħaqdu magħna u jgawdu minn spettaklu kbir. Se jkollna palk mill-akbar u mill-isbaħ, artisti lokali li se jingħaqdu flimkien. Normalment għal kunċert bħal dan wieħed irid iħallas, iżda l-Partit Laburista qed jagħtih b’xejn għal dawk in-nies li jixtiequ jingħaqdu magħna fl-MFCC proprju nhar il-Ħamis li ġej, 6 ta’ Ġunju.”
