Diversi entitajiet governattivi u anki dawk privati jinsabu għaddejjin b’ħidma sabiex jiġu riveduti r-regolameti li jirregolaw l-użu tal-e-scooters f’pajjiżna.
Dan qiegħed isir bil-għan li jinstab bilanċ bejn l-użu ta’ dan il-mod ta’ trasport sostenibbli u effiċjenti għal distanzi qosra filwaqt li tkun assigurata s-sigurtà fit-toroq u f’żoni pedonali madwar il-pajjiż, b’mod speċjali fejn jidħol l-ipparkjar ta’ dawn il-vetturi.
Fid-dawl ta’ dan tkellimna mal-Ministru responsabbli mit-Trasport, l-Infrastruttura u l-Proġetti Kapitali Aaron Farrugia li spjegalna kif bħalissa tinsab għaddejja din il-ħidma li se tkun qed tirrevedi r-regolamenti preżenti li daħlu fis-seħħ madwar tliet snin ilu.
Il-Ministru Farrugia żvela li r-reviżjonijiet se jiffukaw fuq l-infurzar speċjalment b’rabta mal-parkeġġ ta’ dawn il-vetturi kemm jekk ikunu mikrija iżda anki jew dawn ikunu privati.
Qal, “Ħa jkun hemm enforcement ferm ikbar anki issa permezz ta’ Transport Malta fejn qabel ma setgħux imma qegħdin naraw ukoll illi flimkien anki mal-operaturi, għax inti għandek jew operaturi illi jkunu qegħdin joffru l-faċilitajiet tagħhom jew inkella jkollok persuna li xtara l-iscooter hu u jużaha hu biex imur x-xogħol, jivvjaġġa b’mod jew ieħor. Allura qegħdin naraw illi flimkien ikollna pjan ħolistiku ta’ kif anki jkollok postijiet fejn jiġu pparkjati dawn u ovvjament imbagħad ikollok penali għal dawk li ma jpoġġuhx fil-parkeġġ tagħhom.”
Farrugia ta xi eżempji ta’ modi kif dawn il-penali jistgħu jingħataw b’mod effettiv.
Qal, “Pereżempju illi jekk inti ħallast depożitu u tieħdu lura x’ħin iddaħħlu lura, l-iscooter, jekk inti ma poġġejtux ġo parking slot tiegħu inti titilfu jew inkella jekk inti qiegħed fuq credit card tibqa’ tħallas sakemm ikollok idaħħlu fil-parking tiegħu.”
Huwa żied jgħid li anki l-postijiet fejn dawn jintrikbu għadnhom ikunu addattati, għaldaqstant dawn ikunu użati f’toroq assenjati.
Il-Ministru stqarr li dawn ir-regolamenti mistennija li jidħlu fis-seħħ sas-Sajf li ġej hekk kif l-użu tagħhom jiżdied b’mod konsiderevoli madwar il-pajjiż.
B’rabta ma’ dan l-Assoċjazzjoni tal-Kunsilli Lokali ħarġet il-pożizzjoni tagħha b’diversi proposti kif ir-regolamenti jistgħu jkunu riveduti.
F’kitba il-President tal-Assoċjazzjoni Mario Fava li qal kif l-Assoċjazzjoni tal-Kunsilli Lokali qed tipproponi li wieħed iħallas depożitu ta’ €10 li jingħata lura wara li l-iscooter tkun iddaħħlet fil-parking station assenjat għaliha biex ikun inċentivat il-parkeġġ f’postijiet apposta.
L-Assoċjazzjoni qalet ukoll li l-iscooters għandhom jintużaw biss għal vjaġġi lokali filwaqt li m’għandhomx jintrikbu f’żoni pedonali, iżda f’żoni segregati għalihom.
L-użu ta’ ilbies protettiv u sinjali ċari tad-dawl għandhom jitħarsu għas-sigurtà tas-sewwieq.
Dan filwaqt li dawn għandhom jinstaqu biss minn dawk li għadhom ‘il fuq minn sittax-il sena filwaqt li għal dawk iżgħar minn tmintax-il sena l-ilbies protettiv għandu jkun obbligatorju.
L-istess Assoċjazzjoni għamlet referenza għal liċenzji operattivi għal dawk l-operaturi li jikru dawn l-iscooters filwaqt li l-iscooters kollha jkollhom liċenzja adattata.
