Dik li qiegħda tiġi deskritta bħala gwerra ċivili, kompliet tiżvolġi fir-Russja fl-aħħar ħinijiet, hekk kif il-forza merċenarja Wagner qed tisfida t-tmexxija tal-President Vladimir Putin fil-pajjiż stess. Min-naħa l-oħra, il-President Russu tenna li dan hu “tradiment” lill-pajjiż minn min mar kontra x-xewqat l-awtoritajiet Russi.
Il-Kap tal-grupp paramilitari privat, Yevgeny Prigozhin, sejjaħ għal ribelljoni kontra l-armata Russa, għalkemm ċaħad l-akkużi li qed jipprova jagħmel kolp ta’ stat.
Waqt li ma semmiex lil Prigozhin b’ismu, Putin wiegħed f’indirizz lin-nazzjon li se jikkastiga lil dawk involuti.
Prigozhin qal li niesu mhux se jaġixxu skont dak li jgħid Putin, hekk kif huma ma jimxux bil-korruzzjoni u l-burokrazija, iżda huma grupp ta’ patrijotti, li għandhom l-appoġġ tal-poplu Russu. Fl-istess ħin, xejjen l-allegazzjonijiet li għamel Putin fil-konfront tiegħu.
Kelliema għall-Wagner qalu li kkontrollaw belt viċin il-fruntiera Ukrena, fejn ir-residenti ntalbu jibqgħu ġewwa.
Kmieni s-Sibt filgħodu ġew ippubblikati filmati, li allegatament juru forzi ta’ Wagner deħlin fil-belt Russa ta’ Rostov-on-Don fejn iżjed tard qalu li ħadu taħt idejhom kwartieri tal-armata Russa.
Mill-Ġimgħa filgħaxija, is-sigurtà fir-Russja żdiedet, b’vetturi militari jidhru jħufu fit-toroq ta’ Moska, waqt li s-servizz tal-internet ġie restritt.
Prigozhin akkuża lill-armata Russa li attakkat forzi fl-Ukrajna, fejn it-truppi tal-Wagner qed jiġġieldu għar-Russja stess. Dan, iżda, ġie miċħud mill-Kremlin.
L-armata Russa qalet li se toffri protezzjoni lil dawk kollha parti mill-Wagner, jekk dawn jirtiraw, filwaqt li l-mexxej tal-Intelliġenza Russa, Sergei Naryshkin, qal li dan hu attentat ta’ kolp ta’ stat u ribelljoni armata. Skontu dan hu att kriminal li ma jista’ jiġi ġġustifikat bl-ebda kisbiet passati.
Din it-tensjoni interna fir-Russja qanqlet ukoll diversi reazzjonijiet barranin.
Il-President Ukren Volodymyr Zelensky sostna li ebda gidba ma tista’ tgħatti dan il-kaos.
Il-President tal-Kunsill tal-Unjoni Ewropea, Charles Michel permezz ta’ post fuq Twitter, qal li din hi problema interna tar-Russja u stqarr li kien f’kuntatt mal-mexxejja Ewropej u l-imsieħba fil-G7.
Il-Ministeru għall-Affarijiet Barranin tal-Estonja appella liċ-ċittadini tiegħu fir-Russja biex jitilqu mill-aktar fis.
Din is-sitwazzjoni qed tiġi meqjusa bħala l-akbar sfida f’numru ta’ snin li qed tiffaċċja r-Russja.
