Għaddejja fl-aqwa tagħha inizjattiva ta’ proġett komprensiv ta’ restawr fuq il-Knisja l-Qadima tas-Salvatur f’Ħal Lija, li beda fl-aħħar ta’ Ġunju li għadda u li mistenni jitlesta sa bħal dan iż-żmien sena.
Dan il-proġett ta’ restawr hu mmexxi mit-tim tad-Dipartiment tar-Restawr u l-Preservazzjoni.
Waqt żjara fuq il-lant tax-xogħol fil-Knisja, il-Ministru għall-Wirt Nazzjonali, l-Arti u l-Gvern Lokali, Owen Bonnici, qal li “l-impenn li wera l-Kunsill Lokali ta’ Ħal Lija u d-Dipartiment tar-Restawr u l-Preservazzjoni jenfasizza l-valur tal-preservazzjoni tal-wirt kulturali nazzjonali”.
Jakkumpanjaw lill-Ministru kien hemm rappreżentanti tal-Kunsill Lokali ta’ Ħal Lija u l-Perit Jean Frendo, li hi responsabbli mill-proġett.
Il-Ministru tenna li din il-knisja, bl-istorja rikka u s-sinifikat arkitettoniku tagħha, jistħoqqilha tali attenzjoni metikoluża li qed tirċievi.
Hu tenna jirringrazzja lil dawk kollha ddedikati għal dan il-proġett filwaqt li qal li permezz tal-ħidma tagħhom qed niżguraw li din il-biċċa storja tibqa’ ħajja u apprezzata għas-snin li ġejjin.
Il-Perit Jean Frendo spjegat x-xogħol, li qed isir b’reqqa f’diversi stadji, li jinvolvi t-tindif tal-uċuh tal-knisja biex jitneħħew saffi tas-siment, jintuża mehrież speċjali biex jissewwew l-konsenturi, jinbidel il-ġebel u jiġu skolpiti dekorazzjonijiet ġodda biex jinbidlu dawk imkissrin. Minbarra hekk, l-aperturi se jingħataw kisja friska ta’ żebgħa.
Bi storja rikka bħal dik tal-Knisja Parrokkjali ta’ Ħal Lija għal kważi seklu sħiħ, preċiżament bejn l-aħħar tas-Seklu 16 sas-Seklu 17, il-Knisja l-Qadima tas-Salvatur għandha valur kulturali enormi. Id-disinn oriġinali tal-knisja, dak rettangolari, ingħata dehra aġġornata lejn l-aħħar tas-Seklu 16 biż-żieda ta’ transept. Dan it-tragward arkitettoniku u l-koppla elevata tiegħu ra żieda ta’ dawl naturali fil-knisja ġej dirett mit-twieqi tagħha.
