Pazjenti li minkejja li sal-lum jinsabu rikoverati fl-Isptar Monte Carmeli imma li ma jbatu minn ebda problemi ta’ saħħa mentali se jkunu rilokati f’kumpless li jforni servizzi għall-anzjani. Ir-rilokazzjoni tal-pazjenti kkonċernati mistennija tibda għada, it-Tnejn.
Mistoqsi dwar din ir-rilokazzjoni d-Deputat Prim Ministru u Ministru għas-Saħħa Chris Fearne qal lill-gazzetta KullĦadd li “din ir-rilokazzjoni hija parti mill-istrateġija fi pjan ta’ riġenerazzjoni ta’ Monte Carmeli. Se nkunu qegħdin nirrilokaw pazjenti minn tliet swali tal-Ġerjatrija biex fihom mbagħad inkunu nistgħu nieħdu pazjenti minn żewġ swali oħra ta’ Monte Carmeli u b’hekk fuq dawn iż-żewġ swali jinbeda x-xogħol ta’ ristrutturar u tiswijiet meħtieġa. Il-programm ta’ riġenerazzjoni ta’ Monte Carmeli se jkun mifrux fuq perjodu ta’ ħames snin u għalih ġew allokati €30 miljun.”
Is-sitwazzjoni attwali tal-Isptar Monte Carmeli ġiet ikkritikata f’rapport speċifiku mħejji mill-Uffiċċju tal-Awditur Nazzjonali ppubblikat il-ġimgħa li għaddiet, rapport li sadattant ma jikkritikax is-servizzi u l-kura provduti mill-istess sptar lill-pazjenti rikoverati fih.
“Ir-rapport tal-NAO jispeċifika li l-problemi li hemm fl-istruttura ta’ Monte Carmeli ma bdewx ilbieraħ. Biex inkun eżatt nikkwota verbalment x’jgħid eżatt ir-rapport dwar dak li sab l-NAO: Mount Carmel Hospital’s current unacceptable condition is the result of the long-standing legacy of central Government’s lack of commitment towards mental health. Mhumiex problemi li nħolqu taħt l-amministrazzjoni tagħna, imma problemi li ħallew ta’ qabilna għal snin twal u li tefgħuhom taħt it-tapit. Imma dan mhux il-punt kardinali. Il-punt kardinali huwa li aħna nirrikonoxxu dawn il-problemi, se nattakkawhom u se nsolvuhom,” enfasizza d-Deputat Prim Ministru.
Huwa żied jgħid lill-gazzetta li fil-fatt wuħud mill-problemi li jsemmi r-rapport tal-NAO diġà kien għaddej ix-xogħol fuqhom u hemm minnhom li jinsabu fi stadju avvanzat u dan skont Masterplan għall-Isptar Monte Carmeli, pjan li ma nħoloqx b’riżultat tar-rapport tal-NAO, “pjan li jkopri r-riġenerazzjoni strutturali ta’ Monte Carmeli u t-titjib fil-prattiċi tiegħu. Dan fl-isfond tal-fatt li s-saħħa mentali hija prijorità tematika ta’ l-Istrateġija Nazzjonali tas-Saħħa 2020-2030, li għaliha tlabna u sibna l-għajnuna tal-WHO Euro u taċ-Ċentru ta’ Kollaborazzjoni tal-WHO fuq is-saħħa mentali f’Barts. Barra minn hekk, għandna ppjanat ukoll li f’Novembru li ġej insejħu konferenza nazzjonali dwar l-Istrateġija Nazzjonali tas-Saħħa 2020-2030 li għaliha jkun mistieden kull min hu kkonċernat,” qal id-Deputat Prim Ministru.
Il-Masterplan għal Monte Carmeli jaħseb biex sa tmiem is-sena 2018 jkun sar xogħol fuq erba’ swali; b’żewġ swali oħra jitlestew sa tmiem is-sena 2019; tnejn oħra sa tmiem is-sena 2020; żewġ swali oħra fis-sena 2021 bl-aħħar waħda titlesta fis-sena 2022.
Id-Deputat Prim Ministru temm jgħid lill-gazzetta li dan ix-xogħol kollu jkun għaddej waqt li jibqgħu jingħataw is-servizzi ta’ kura għas-saħħa mentali li qegħdin jingħataw bħalissa.
Sadattant għaddej il-proċess biex jingħata bidu għal twettiq ta’ wegħda elettorali oħra tal-Partit Laburista fejn jirrigwarda s-saħħa mentali: Bħala parti mill-investiment fil-faċilitajiet mediċi nibnu sptar ġdid tal-kura psikjatrika qrib Mater Dei.
Nhar il-Ġimgħa li għaddiet waqt konferenza tal-Aħbarijiet li kienet tittratta r-rapport tal-NAO dwar Monte Carmeli d-Deputat Prim Ministru u Ministru għas-Saħħa Chris Fearne ħabbar li s-sit fejn se jkun qed jinbena dan l-isptar il-ġdid ġie identifikat. L-isptar il-ġdid mistenni jkollu madwar 100 sodda li se jkunu qegħdin jikkumplimentaw is-servizzi mogħtijin minn Monte Carmeli u li issa se jkun qed jingħata dehra ferm differenti minn dik attwali.
