Tħabbru d-dettalji tal-Ġimgħa Ewropea għall-Isport, li qed tiġi organizzata f’pajjiżna bejn it-23 sat-30 ta’ Settembru. Pajjiżna se jkun fost l-40 pajjiż li se jieħdu sehem f’din il-ġimgħa mżewqa ta’ attivitajiet.
Din l-edizzjoni se tiffoka fuq l-involviment, l-inklużjoni u l-innovazzjoni, filwaqt li toħloq kuxjenza ta’ stil ta’ ħajja aktar attiv. Dan fid-dawl li l-istatistiċi juru li ħafna persuni ma jgħixux ħajja bilanċjata, li fiha jdaħħlu l-element importanti ta’ sport u eżerċizzju fiżiku.
Il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, Clifton Grima, qal li permezz ta’ SportMalta u l-kampanja #BeActive, issir promozzjoni għall-isport u l-attività fiżika, sa minn età żgħira fl-iskejjel.
Qal, “Fejn ikun hemm investimenti fil-faċilitajiet tal-iskejjel tagħna biex nassiguraw li aktar nies jagħmlu l-attività fiżika. Irrid ngħid ukoll li din l-edizzjoni, għamilna sħubija ma’ diversi stakeholders, nies li ġejjin mill-qasam privat, li qegħdin jaħdmu id f’id magħna biex nattiraw aktar nies lejn dawn l-avvenimenti.”
Il-Ministru Grima, flimkien ma’ RoseMarie Mercieca, li hi l-kordinatriċi tal-avvenimenti, taw dettalji tal-attivitajiet li se jsiru matul din il-ġimgħa, fosthom il-#BeActive Night – The Fitness Challenge, li se ssir is-Sibt 23 ta’ Settembru fil-Kumpless Sportiv tal-Kottonera fis-sebgħa ta’ filgħaxija, u l-avveniment prinċipali l-Ħadd 24 ta’ Settembru fit-tlieta ta’ waranofsinhar fil-Kumpless Sportiv tal-Marsa.
Qalet, “Huma kollha opportunitajiet biex wieħed ikun attiv, biex tkun tista’ tkun attiv, permezz tal-fitness u l-isport, u kull darba li tiċċaqlaq, li tkun attiv, u meta tkun attiv, dejjem ħa jgħin għal stil ta’ ħajja aktar sana.”
L-għan hu li jinħoloq villaġġ sportiv b’attivitajiet li jappellaw liċ-ċittadini kollha.
L-istituzzjonijiet edukattivi kollha huma mistiedna wkoll jipparteċipaw fl-avveniment annwali tal-Jum Nazzjonali tal-Isport organizzat minn SportMalta, li se jsir nhar il-Ġimgħa, 13 ta’ Ottubru 2023.
Il-Ministru Grima qal li l-Kummissjoni Ewropea tenfasizza li l-Ġimgħa Ewropea tal-Isport għandha sservi biex tippromwovi aktar azzjoni favur l-attività fiżika.
Is-Segretarju Permanenti fi ħdan il-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, Matthew Vella, appella għal ħidma aktar integrata biex issir promozzjoni għal ħajja aktar sana.
