It-Tnejn, quddiem il-Kabinett, se jitressaq il-pjan ta’ rkupru bil-fondi li ġew innegozjati f’Lulju tas-sena li għaddiet fuq livell Ewropew.
F’intervista fuq ONE Radio l-Ħadd filgħodu, il-Prim Ministru Robert Abela fakkar kif is-sena l-oħra, dan il-Gvern innegozja tliet mija u għoxrin miljun ewro, minkejja li ħafna fatturi kienu kontra Malta.
Il-Prim Ministru qal li l-pjan ta’ rkupru se jissarraf fi proġetti essenzjali għall-pajjiż u l-ħolqien ta’ aktar impjiegi.
Qal, “Issa, fil-ġimgħat li ġejjin, se nkunu qed naraw il-frott ta’ dawk in-negozjati meta wara li jingħalaq dan il-proċess u jkollna dan il-pjan ta’ rkupru approvat, dak se jissarraf fiex? Fi proġetti li huma essenzjali għal pajjiżna u hemmhekk ukoll irridu mhux biss ngħidu li ħa nagħmlu l-proġetti imma dawk il-proġetti jridu jingħaqdu fil-viżjoni aktar fit-tul li għandna għal pajjiżna.”
Il-Prim Ministru kien qed jitkellem fi tmiem ġimgħa ta’ impenji barra minn xtutna.
F’laqgħa fil-Kunsill Ewropew mas-Segretarju Ġenerali tal-Ġnus Magħquda, Antonio Guterres, ġew diskussi l-immigrazzjoni u l-Libja.
Il-pożizzjoni ta’ Malta kienet dik li huwa inġust li pajjiżi eqreb lejn il-Libja, bħal Malta, jerfgħu piż sproporzjonat u saħaq li s-soluzzjoni tibqa’ li l-Libja jkollha r-riżorsi meħtieġa fil-fruntieri biex twaqqaf l-influssi.
Dr Abela qal li l-pandemija kienet fiċ-ċentru tad-diskussjonijiet fi ħdan il-Kunsill Ewropew, fejn ġie nnutat il-paragun bejn x’ġara fil-kriżi ekonomika ta’ għaxar snin ilu u dik tal-pandemija.
Spjega, “Minn politika t’awsterità għaxar snin ilu, illum morna għall-politika li ninvestu fin-nies. Id-differenza li l-Kummissjoni Ewropea ħadet approach li huwa wieħed koordinat, jiġifieri mhux kull pajjiż telaq għal rasu imma l-Kummissjoni ppilotat numru t’inizjattivi fosthom fix-xiri tal-vaċċin, hemmhekk pajjiżna kien wieħed mill-katalisti li mbotta l-idea tal-Joint Procurement tal-vaċċin u tara d-differenza.”
Min-naħa l-oħra, id-diskussjoni f’Berlin iffukat dwar l-ekonomija, anki f’kuntest ta’ pandemija.
Hawnhekk, il-Prim Ministru kien qed jitkellem f’jum meta pajjiżna qabeż iċ-ċifra ta’ aktar minn sebgħin fil-mija tal-popolazzjoni mlaqqma kompletament, u aktar minn tmenin fil-mija li minn tal-inqas ħadu l-ewwel doża.
Qal, “Meta tara l-istatistika li ġiet imqassma proprju kif beda l-Kunsill Ewropew, tara table minnhom kienet turi li għal kull mitt persuna f’pajjiżna, ingħataw mija u ħamsa u erbgħin doża, jiġifieri meta tara ċ-chart konna fuq quddiem nett, u fuq quddiem b’ħafna.”
Minkejja dan is-suċċess, il-Prim Ministru kellu messaġġ ta’ kawtela dwar is-sitwazzjoni tal-imxija f’pajjiżna.
Robert Abela qal li minkejja li jidhru passi żgħar, pajjiżna qed ikompli jiftaħ b’mod prudenti.
Semma l-iżvilupp din il-ġimgħa, li r-Renju Unit poġġa lil Malta fuq il-lista l-ħadra, u qal li anki hawnhekk pajjiżna jinsab kawt, hekk kif qed jaċċetta turisti Ingliżi biss, jekk jiġu biċ-ċertifikat tal-vaċċin.
Qal, “It-turiżmu huwa kruċjali għal pajjiżna. Tant setturi li jaħdmu jew direttament mal-industrija jew is-servizzi anċillari relatati ma’ din l-industrija, imma fl-istess waqt li nipproteġu s-saħħa tan-nies u għalhekk toħloq dak il-bilanċ tant importanti bejn l-ekonomija u s-saħħa u ġġibhom dejjem kumplimentari għal xulxin.”
