Minn għada jibdew jinxteħtu l-ewwel voti. Għada jibda l-unika survey li jgħodd.
Kien b’dan il-mod li l-Prim Ministru u Mexxej Laburista, Robert Abela beda diskors b’appell b’saħħtu l-Ġimgħa filgħaxija fil-Fgura, lejlet li n-nies jibdew jivvutaw u jagħżlu bejn min irid jieħu lil Malta fil-passat u min għandu viżjoni b’elf proposta xi jwettaq għal Malta aħjar.
Fi Vjal il-Kottoner, Robert Abela kompla jispjega l-pjan u l-viżjoni tal-Partit Laburista li turi l-importanza li l-poplu jagħżel lill-Partit Laburista biex jibqa’ jmexxih tul il-ħames snin li ġejjin.
“Agħmlu lilkom infuskom din il-mistoqsija. Staqsu jekk f’sentejn li ma kienu faċli xejn konniex magħkom? Staqsu jekk ħadniex kull deċiżjoni li kien hemm bżonn biex ħarisna l-ħajjiet? Staqsu jekk iddeċidejniex fil-ħin it-tajjeb biex salvajna l-impjiegi? Staqsu lilkom infuskom jekk minkejja li kienu żminijiet bla preċedent ħloqniex il-bilanċ bejn is-saħħa u l-għajxien? U staqsu wkoll jekk konniex ta’ appoġġ biżżejjed għan-negozji biex salvajna l-ekonomija? Jekk ir-risposta għal dan kollu hija iva, allura l-appell hu biex tgħinnuna nibnu fuq dak li għamilna. Jekk fid-diffikultà ħadna d-deċiżjoni t-tajba, immaġinaw x’nistgħu nagħmlu jekk tafdawna b’mandat ġdid li jarana nibdew naħdmu mill-bidu fuq l-elf proposta li għandna.”
il-Prim Ministru Robert Abela
Filwaqt li elenka lista sħiħa ta’ miżuri ntiżi li jkomplu jtejbu l-kwalità tal-ħajja tal-Maltin u tal-Għawdxin kollha, il-Prim Ministru nnota li l-Partit Laburista jaħseb f’kulħadd u ma jinsa lil ħadd.
Hekk kif kien fil-Fgura, semma l-investimet li sar f’dan id-distrett u aktar proġetti maġġuri li mistenna jkunu lesti fil-futur qrib.
“Fit-tieni distrett qatt ma sar investiment daqskemm sar fl-aħħar snin. L-aħbar it-tajba hi li se nagħmlu iktar. Sal-aħħar ta’ din is-sena se jinfetaħ il-Paola Health Hub. Se jitlesta l-bini ta’ kumpless ġdid tal-futbol u r-rugby f’Raħal Ġdid. Iż-żona li fuqu qed jinbena dan il-kumpless se nibdluha minn miżbla għal ċentru sportiv tal-ogħla standards. Mill-miżbliet aħna għamilna żewġ spazji miftuħa ġodda u ċentru sportiv u ħaddieħor minn miżbla waħda kien jagħmel oħra u oħra għax ma kellux pjan.”
il-Prim Ministru Robert Abela
Il-Prim Ministru appella biex min għadu ma ġabarx il-vot, imur jiġbru.
Semma nies bħal Beppe Fenech Adami, Jason Azzopardi, Karol Aquilina u David Agius li se jerġgħu jmexxu lil pajjiżna jekk in-nies jibqgħu d-dar u ma joħorġux jivvutaw.
Wiegħed li jekk jingħata l-fiduċja, se jżomm saqajh mal-art bħalma għamel sa issa u aktar ma tkun b’saħħitha l-fiduċja, aktar se tkun b’saħħitha l-umiltà.
Qal li l-Partit Laburista se jsarraf il-fiduċja f’xogħol u aktar ġid għall-familji Maltin u Għawdxin.
“Hawn min iridkom temmnu li l-vot tagħkom mhux se jagħmel differenza. Hawn min irid jgħid li bilfors se jirbaħ il-Partit Laburista u daħħal sens li mhux importanti tmur tivvota. M’għandniex naqgħu għal din il-lixka. Sa issa għadu ma ġiex mixħut mank vot wieħed. L-elezzjoni tibda xejn b’xejn u jekk forsi int se tibqa’ d-dar, ħaddieħor mhux se jagħmel bħalek.”
il-Prim Ministru Robert Abela
