Minn għada se jerġa’ jibda jiltaqa’ l-Parlament Malti wara waqfa ta’ ftit ġimgħat għall-btajjel tas-sajf. Għalkemm ix-xhur tas-sajf kienu impenjattivi għall-Gvern. Dan mhux biss minħabba l-implimetazzjoni politika iżda wkoll għaliex ilGvern kien qed iħejji l-aġenda parlamentari tiegħu. Aġenda ta’ gvern li ma jibżax mill-bidla u li għandu l-għan ikompli jtejjeb il-ħajja tal-familji Maltin u Għawdxin. Il-Whip tal-Grupp Parlamentari tal-Partit Laburista Byron Camilleri sostna li aġenda riformista se tkun implimentata fix-xhur li ġejjin.
Aġenda riformista li ħafna drabi ma sabitx l-appoġġ tal-Oppożizzjoni. “Wara kollox, din l-istess Oppożizzjoni vvutat kontra l-estensjoni tal-liġi tal-IVF għal aktar persuni u kontra l-liġi biex tipproteġi lill-vittmi tal-vjolenza domestika,” qal Camilleri. Mistoqsi dwar l-ewwel liġijiet għal din l-aġenda fil-jiem li ġejjin, qal li hemm dawk relatati ma’ organizzazzjonijiet volontarji, emendi flatt dwar in-negozji tal-familja kif ukoll tisħiħ fis-servizzi finanzjarji ta’ pajjiżna bl-emendi għal-liġi li tirregola l-MFSA.
M’għandniex xi ngħidu, żied il-Whip, hemm fl-aqwa tagħhom ukoll it-tħejjijiet għallbaġit li se jitressaq fit-22 ta’ Ottubru. Iktar passi favur governanza Camilleri spjega wkoll li l-ħatra tal-ewwel Kummissarju Parlamentari ta’ Malta għall-Istandards se tkun mozzjoni importanti ħafna, mozzjoni li ssarrfet minn qbil bejn iż-żewġ partiti ewlenin ta’ pajjiżna u li se tiġi diskussa u approvata fil-ġimgħat li ġejjin. Xi jfisser dan?
Il-Whip enfasizza li dan huwa pass ieħor fost ħafna li dan il-Gvern għamel biex isaħħaħ il-governanza u l-istat tad-dritt. Għalhekk, il-Gvern aċċetta l-proposta tal-Oppożizzjoni biex Dr. George Hyzler jinħatar l-ewwel Kummissarju. “Din hija prova oħra li minkejja li l-Partit Laburista għandu l-akbar maġġoranza li partit qatt kellu fl-istorja ta’ pajjiżna, dan l-istess partit m’għandu l-ebda problema biex ikun miftuħ għall-iskrutinju,” kompla l-Whip Laburista. Il-vot fuq din il-ħatra se jkun qed jittieħed fit-30 ta’ Ottubru, tmint ijiem wara l-baġit ta’ din is-sena flimkien ma’ voti relatati mal-baġit.
Il-qbil fuq din in-nomina huwa wkoll xhieda ta’ kemm il-Gvern ifittex il-koperazzjoni u d-dibattitu ġenwin bejn iż-żewġ partiti. Bidla oħra hi li l-Parlament issa se jkun qed jitlaqqa’ bejn l-4pm u s-7.30pm nhar ta’ Tlieta u nhar ta’ Erbgħa, filwaqt li s-sessjonijiet tat-Tnejn xorta se jsiru bejn is-6pm u d-9.30pm, apparti s-sessjonijiet ta’ filgħaxija matul is-seduti tal-baġit. “Se nistenna bil-ħerqa li nżomm is-sessjonijiet kollha bejn l-4pm u s-7.30pm,” kompla Camilleri dwar miżura li tagħmel il-parlament iktar aċċessibbli. Ħidma li bdiet b’saħħitha Qabel il-Parlament aġġorna għal btajjel tas-sajf kienu għaddew 45 liġi ġdida mill-bidu tal-leġiżlatura. Xhieda ta’ gvern b’enerġija u pjan bil-għan li jħejji Malta ta’ Għada.
In-numru rekord ta’ liġijiet approvati fl-ewwel sena tal-leġiżlatura huma liġijiet minn oqsma differenti b’uħud minnhom huma saħansitra storiċi. Fosthom iż-Żwieġ Indaqs u l-Vot 16. Importanti wkoll liġijiet li jirregolaw is-settur tal-blockchain u l-cryptocurrency li se jwasslu għal għadd kbir ta’ opportunitajiet. Bidla kbira wkoll hija t-twaqqif ta’ Infrastruttura Malta. Fl-ewwel sena tal-leġiżlatura l-Parlament kompla jissaħħaħ. Fosthom bil-kumitat li qed jiskrutinja l-ħatriet pubbliċi.
