Il-Programm ta’ Ċittadinanza b’Investiment tul dawn l-aħħar tliet snin u nofs ġibed lejh persuni tal-ogħla kalibru, li qed iħarsu lejn pajjiżna bħala post fejn jistgħu jinvestu. Ikkonferma dan Jonathan Cardona, il-Kap Eżekuttiv tal-Programm ta’ Ċittadinanza b’Investiment, li fil-programm Nistaqsu il-Ħamis filgħaxija ħares lejn uħud minn dawn.
“Għandna min fetaħ kumpaniji ta’ ICT u llum qed jimpjega madwar 80 ruħ. Għandna persuna oħra li naf li qed jibni fabbrika biex jibni fabbrika fuq home decor hawn Malta. Għandna ieħor, kumbinazzjoni ltqajt miegħu l-ġimgħa li għaddiet, qiegħed fil-proċess biex jiftaħ fabbrika tal-farmaċewtika, ilbieraħ kellna persuna oħra li se jinvesti diversi miljuni f’developments, malls u dat-tip t’affarijiet, qed jara x’jista’ jsir u ma jsirx,” qal Cardona.
Kien innutat kif minbarra negozju, pajjiżna qed jiġbed ukoll persuni interessati li jiżguraw futur sigur għall-familji tagħhom.
Wara li fil-bidu tal-programm kien hemm numru kbir ta’ applikanti mir-Russja u l-Lvant Nofsani, issa kienet innutata żieda minn pajjiżi bħall-Indja, iċ-Ċina u l-Amerka t’Isfel.
Nies li jkunu skrutinizzati b’dak li huwa kkunsidrat bħala l-iktar proċess ta’ due diligence rigoruż – proċess li waħdu jieħu mal-erba’ xhur. Proċess li bħala medja jirrifjuta ċ-ċittadinanza lil wieħed minn kull ħames applikanti.
Proċess importanti, għaliex kif stqarr magħna l-aġent akkreditat għal dan il-programm – Francis Vassallo, pajjiżna ħaqqu biss l-aqwa nies.
“Malta għandha tirbah persuna ta’ due diligence tajba. Mhux li l-aġent ibigh il-passaport lil min iridu. Igifieri d-due diligence ghandha tkun għolja, għax dak hu l-club. Malta għandha tkun il-club tal-unjoni ewropea,” qal Vassallo.
Cardona spjega li f’dan il-programm li għandu limitu ta’ elf u tmien mitt familja, s’issa ġew aċċettati madwar seba’ mija, filwaqt li hemm ftit iktar minn elf applikazzjoni li qed jiġu proċessati.
F’dan il-punt, se jitnieda proċess biex il-programm jittejjeb, kif spjegat is-Segretarju Parlamentari responsabbli miċ-Ċittadinanza, Julia Farrugia Portelli.
“Aħna rridu li dan il-programm ikompli jissaħħaħ u jkun irfinut. Fil-fatt fil-ġimgħat li ġejjin se nkunu qegħdin inniedu konsultazzjoni pubblika mal-istakeholders differenti biex nieħdu wkoll stokk tas-sitwazzjoni, biex naraw fejn kunċetti differenti li wieħed jista’ jieħu in-konsiderazzjoni u mod kif wieħed jista jtejjeb dan il-prodott,” spjegat Farrugia.
B’hekk il-Programm ta’ Ċittadinanza b’Investiment jittejjeb, fosthom bit-tisħiħ tad-due diligence, u tnaqqis ta’ burokrazija mhux meħtieġa.
Programm li b’mod dirett daħħal mal-ħames mija u ħamsin miljun ewro, li mitejn u ħamsin miljun minnhom li marru fil-Fond għall-Iżvilupp Nazzjonali u Soċjali. Fond li għandu l-iskop li jmiss u jtejjeb il-ħajja ta’ kuljum tan-nies, bħal bil-proġett tat-tiswija tat-toroq, imma anke fl-edukazzjoni, riċerka, proġetti soċjali u saħħa pubblika.
