Studenti Maltin jibbrillaw fil-matematika! Minkejja kompetizzjoni kbira fost eluf ta’ tfal madwar id-dinja, marru tajjeb ferm fis-SuperTmatik Mental Maths Championship.
Dan huwa kampjonat internazzjonali li jsir kull sena fost studenti ta’ bejn sitt snin u l-15-il sena. Kull student ipparteċipa f’kategorija waħda minn disgħa, skont l-abilità tiegħu jew tagħha.
F’kategorija disgħa kisbet l-ewwel post Celeste Grech mill-iskola nazzjonali tal-isport. U fit-tielet kategorija reġa’ ġie l-ewwel Hayden Micallef mill-iskola primarja Maria Reġina tal-Mellieħa. Tfajjel li ltqajna miegħu meta rebaħ is-sena li għaddiet. It-tieni post fl-istess kategorija ntrebaħ minn Kayden Farrugia Falzon. F’dan il-filmat jidher ukoll Daniel Petersons, li reġa’ mar tajjeb billi kiseb is-sitt post fit-tielet kategorija.
Fi stqarrija l-Ministeru għall-Edukazzjoni ħabbar l-ismijiet tar-rebbieħa.
